اسلام آباد(پاکستان پوائنٹ نیوز21۔اگست۔2018ء) چیف آف آرمی سٹاف جنرل قمر جاوید باجوہ نے آکھیا اے کہ پاکستان نے دہشتگردی نوں موثر انداز نال شکست دتی، پاکستان نوں انھیرے وچ جھونکن دی کوشش کرن والیاں طاقتاں نال اک ہوکے لڑاں گے، بہادری نال لڑ کے دہشت گردی دا شکار ہون والے خانداناں نال آں، اسیں ہر قسم دی دہشتگردی دی مذمت کرنے آں۔ ترجمان پاک فوج ڈی جی آئی ایس پی آر میجر جنرل آصف غفور نے اپنے ٹویٹ وچ آکھیا کہ چیف آف آرمی سٹاف جنرل قمر جاوید باجوہ نے دہشت گردی دا شکار بندیاں دے عالمی دیہاڑ دے موقعے اُتے اپنے پیغام وچ آکھیا کہ پاکستانی قوم تے ہتھیار بند فوجاں(مسلح افواج ) بھرپور انداز وچ دہشت گردی دے چیلنج نال لڑ رہیاں نیں۔
آرمی چیف جنرل قمر جاوید باجوہ نے ایس موقعے تے دہشت گردی توں متاثرہ بندیاں نوں خراج تحسین پیش کیتا۔ آرمی چیف نے آکھیاکہ بہادری نال لڑ کے دہشت گردی دا شکار ہون الے بندیاں تے اوہناں دے وارثاں نال آں۔ آرمی چیف نے آکھیا کہ پاکستان دیرپا امن تے سلامتی دے قیام لئی ساریاں طاقتاں دی پوری حمایت کردا اے۔ پاکستان نے اک ہوکے دہشت گردی نوں موثر انداز نال ہرایا۔ جنرل قمر جاوید باجوہ نے آکھیاکہ قوم دے عزم تے حوصلے نال مخالف طاقتاں نوں ہراواں گے۔ یاد رہوے کہ آرمی چیف جنرل قمر جاوید باجوہ حج کرن لئی مکہ وچ نیں۔
