لاہور(پاکستان پوائنٹ نیوز03۔اکتوبر۔2018ء) لاہوروں لاپتا ہون والے بال دی لاش لبھ گئی۔تفصیل مطابق لاہور دے علاقے اقبال ٹاؤن نجف کالونی توں پچھلے دیہاڑے لاپتا ہون والے بال دی لاش لبھ گئی اے۔پولیس دا کہنا اے کہ 9سال دے علی رضا دی لاش راوی دریا دے کولوں لبھی۔ لاش پوسٹ مارٹم لئی مردہ خانے منتقل کر دتی گئی اے۔ پولیس دا ہور آکھنا اے کہ موت دی وجہ کیہ اے کُجھ وی آکھنا ویلے توں پہلاں ہوئے گا پر ایس حوالے نال تفتیش شروع کر دتی گئی اے۔
دوجے پاسے علی رضا نال زیادتی کرن والا مبینہ ملزم نعیم پولیس مقابلے وچ ہلاک ہو گیا اے۔ پولیس دا دعوا اے کہ ملزم ساتھیاں ولوں چھڈوائے جان دی کوشش وچ ماریا گیا۔ ملزم بال دے اغوا ، زیادتی تے قتل وچ ملوث اے۔ پولیس مطابق علی رضا دے ماں پیو دے شک اُتے ملزم نعیم نوں گرفتار کر کے تفتیش کیتی جا رہی سی۔ ملزم نعیم دے اعتراف اُتے بال دی لاش برآمدگی لئی لیجایا جا رہیا سی کہ اوہنوں ساتھیاں نے فرار کران دی کوشش کیتی تے فائرنگ دے تبادلے وچ ملزم ہلاک تے اوہدے ساتھی فرار ہو گئے۔
