اسلام آباد(پاکستان پوائنٹ نیوز24۔فروری2018ء) وفاقی راجدھانی وچ مشہور ٹیکسی سروس ’کریم‘ دے ڈرائیور دے قاتل نوں گرفتار کر لیا گیا اے۔ پولیس نے ملزم عطاء اللہ نوں میڈیا ساہمنے پیش کیتا۔ ایس ایس پی سٹی زبیر احمد شیخ دا کہنا سی کہ کریم ڈرائیور دے ملزم نوں گرفتار کر لیا گیا اے۔ ملزم دی گرفتاری سی سی ٹی وی فوٹیج دی مدد نال ہوئی۔ ملزم عطاء اللہ ایس توں پہلاں وی گن پوائنٹ اُتے ایس طرحاں دیاں وارداتاں کردا رہیا اے۔
میڈیا ٹاک دوران ای ملزم عطاء اللہ نے اپنے مونہ توں کپڑا پردے کیتا۔ ملزم میڈیا نال گل بات کرنا چاہندا سی جہدے اُتے ایس ایس پی سٹی پولیس نے اہلکار اں نوں ہدایت کیتی کہ ملزم نوں اندر لے جاؤ،ایس دوران ملزم نے رولا پانا شروع کر دتا کہ میں اوہنوں قتل نہیں کیتا۔ مینوں قربانی دا بکرا بنایا جا رہیا اے۔ پر ملزم نوں میڈیا نال گل بات کرن دی اجازت نہیں دتی گئی تے پولیس اہلکار اوہنوں زبردستی اندر لے گئے۔ پولیس ولوں ملزم نوں میڈیا نال گل بات توں منع کرن اُتے میڈیا نمائندیاں نے وی تشویش دا وکھالا کیتا اے۔ چیتے رہوے کہ دو دن پہلے کریم دے ڈرائیور مصطفی نوں رائیڈ دوران ای فائرنگ کر کے قتل کیتا گیا سی۔
