اِکو ویلے تن دنند کڈھوان دے نتیجے وچ روگی ہلاک ہو گیا

ہبالی(پاکستان پوائنٹ نیوز18۔دسمبر2017ء) ہبالی وچ اِکو ویلے تن دنند کڈھوان دے نتیجے وچ روگی ہلاک ہو گیا ۔ تفصیل مطابق عبدالخادر نامی اک روگی چیک اپ لئی ڈینسٹ کول گیا جتھے دنداں دے ڈاکٹر نے اکوویلے ای اوہدے تن دند کڈھ دتے۔ دند نِکلن دے نتیجے وچ خون بُہتا نکلیا تے روگی جہانوں چلا گیا۔روگی دے بھرا عبدالرزاق نے رتنا ڈینٹل کلینک دے ڈاکٹر خلاف رپورٹ درج کروا دتی اے۔

مقدمے وچ دسیا گیا اے کہ 8دسمبر نوں روگی نوں رات ویلے درد ہوئی تے اوہنوں رتنا ڈینٹل کلینک لیاندا گیا۔ مقدمے وچ الزام لایا گیا کہ 11دسمبر نوں ڈاکٹر نے مبینہ طور اُتے اک خط اُتے بے ہوشی دی حالت وچ پئے روگی دا انگوٹھا لوایا۔ جہدے وچ لکھیا گیا سی کہ ڈاکٹر روگی دی حالت دا کسے طور اُتے وی ذمے وار نہیں اے۔ ڈاکٹر نے روگی نوں 10ہزار رُپئے وی دتے۔ روگی دے وارثاں دا کہنا سی کہ عبدالخادر دی موت بُہتا خون نکلن دی وجہ توں ہوئی۔ دوجے پاسے ڈینٹسٹ دا کہنا اے کہ ایہ سچ اے کہ روگی دا بُہتا خون نکلیا پر اوہدے وارثاں نے مینوں ایس بارے نہیں دسیا۔ اوہناں نے مینوں تن دن بعد دسیا کہ خون بُہتا نکلن دی وجہ توں عبدالخادر نوں ہسپتال منتقل کر دتا گیا اے۔