اسلام آباد(پاکستان پوائنٹ نیوز19۔اگست2017ء) مسلم لیگ (ن) نے سابق وزیر اعظم نواز شریف نال اسلام آباد توں لاہور تیکر جی ٹی روڈ توں اک احتجاجی ریلی کڈھی۔ ایس ریلی نے جی ٹی روڈ اُتے تھاں تھاں قیام کیتا تے ایس دوران نواز شریف تے اوہناں دی ریلی دا چاہواں نال استقبال دے نال نال نواز شریف دے صدقے لئی بکرے وی تیار کیتے گئے۔ پر گجرات وچ (ن) لیگی کارکن اورنگیزیب بٹ نے قیادت تے نواز شریف دی نظر وچ اپنا مقام بنان تے اپنی واہ واہ کروان لئی دو دن پہلے ای صدقے دا اونٹھ لیا کے کھلار دتا جہدے اُتے ’ہم سب نواز ہیں‘ لکھیا سی۔
پر ایس صدقے دے اونٹھ بارے انکشاف ہویا اے کہ ایہ اونٹھ کرائے اُتے لیاندا گیا سی۔ نواز شریف تے گجرات توں لنگھ گئے پر اونٹھ قربان نہ ہو سکیا۔ اورنگزیب بٹ نے اپنے نمبر ٹنگھن مگروں نواز شریف دے صدقے لئی لیاندا گیا اونٹھ اوہدے مالک بشیر نوں کرائے دتے بغیر ای واپس کر دتا۔ دس ہزار رُپئے کرایہ لین لئی اونٹھ دا املک کئی وار اورنگزیب بٹ دے ڈیرے اُتے چکر لاندا رہیا پر اوہنوں کُجھ نہ ملیا۔ اونٹھ دے مالک نے مطالبہ کیتا اے کہ اوہدا کرایہ مسلم لیگ (ن) دی قیادت توں لے کے دتا جائے۔
