ممبئی(پاکستان پوائنٹ نیوز30۔دسمبر2016ء) بالی ووڈ دے مشہور ہدایتکار کرن جوہر نے آکھیا اے کہ ویاہ تے پیو بننا میری قسمت وچ نہیں اے کیوں جے میں بہت سارے لوکاں نوں ویاہ کر کے خش نہیں ویکھیا۔ تفصیل دے مطابق بالی ووڈ ہدایتکار کرن جوہر دا شمار فلم نگری وڈے فلمز سازاں وچ ہوندا اے جہناں نے ہن تیکر کئی بلاک بسٹر فلماںدی ہدایتکاری دے فرض نبھائے نیں جہدے وچ ’کچھ کچھ ہوتا ہے‘ ’کبھی خوشی کبھی غم‘ کبھی الوداع نہ کہنا‘ مائی نیم از خان‘ تے ’اے دل ہے مشکل‘ ورگیاں فلماں شامل نیں۔
کرن جوہر کامیاب کیریئر دے مگروں وی اجے تیکر کنوارے نیں پر اوہناں نے ویاہ دے حوالے نال حسرت دا وکھالا کیتا اے۔ اک انٹرویو وچ اوہناں نے آکھیاکہ ویاہ تے پیو بننا میری قسمت وچ نہیں اے میں بہت سارے لوکاں نوں ویاہ کر کے خش نہیں ویکھیا ، ایس لئی میں اپنے آپ نوں خش قسمت سمجھنا واںجدکہ میں بتھیرا سوچن دے بعد اپنے پیشے نال ویاہ کر لیا اے ایس لئی اپنی ہر فلم نوں بچہ سمجھنا واں۔
کرن جوہر نے آکھیا کہ عالیہ بھٹ تے ورن دھون سنے کئی اداکاراں نوں اپنے بالاں وانگ ویکھنا واں کیوں جے ایہ بال مینوں ماں پیو والی عزت دیندے نیں ایس لئی مینوں لگدا اے کہ میں ہن پیو بناں گا ای نہیں بلکہ انج نہیں اے کہ میں اپنی زندگی نوں ادھورا سمجھنا واں بلکہ میں اپنے پیشے وچ اپنے آپ نوں مکمل سمجھنا واں۔
