لاہور(پاکستان پوائنٹ نیوز08۔ستمبر۔2018ء) فلمسٹار میرا اک وار فیر اپنے ہسپتال پراجیکٹ لئی سرگرم ہو گئیاں،میرا گورنر پنجاب چودھری سرور نال ملاقات کرن گیاں۔اداکارہ دا کہنا ا ے کہ چودھری محمد سرور نوں غریباں دے ہسپتال لئی زمین دین دا وعدہ یاد کراواں گی۔وسیلیاں مطابق چار ورھے پہلاں اداکارہ میرا نے گورنر پنجاب چودھری سرور نال ملاقات کیتی سی ۔
ملاقات دوران اداکارہ ولوں ہسپتال لئی زمین دین دی بینتی کیتی گئی سی ، جیہدے اُتے چودھری سرور نے وعدہ کیتا سی کہ اوہ ایس حوالے نال اوہناں دی مدد کرن گے پر بعدوں چودھری سرور مستعفی ہو کے تحریک انصاف وچ رلتی ہو گئے تے ہن اوہ فیر گورنر پنجاب بنے نیں۔ جیہدے اُتے اداکارہ میرا نے خشی دا وکھالا کردے ہوئے آکھیا کہ انج دے بندے نوں ای گورنر ہونا چاہیدا جو اصولاں دی پاسداری کردا ہوئے تے اوہدے دل وچ انسانیت دا درد ہوئے۔ اوہناں نے آکھیا کہ میں غریباں لئی اپنے ہسپتال دے پراجیکٹ بارے گورنر پنجاب نال ملاقات کرن دی خاہشمند آں تے مینوں یقین اے کہ اوہ میری بینتی اُتے غور کردے ہوئے ہسپتال لئی تھاں دین گے۔
