اداکارہ نرگس نے صوبائی وزیر اطلاعات فیاض الحسن دی کلاس لے لی

منسٹر صاحب! ہر بندہ عزت دار اے،کسے وی گھر بیٹھی سوانی بارے ایس طرحاں دے اکھر نہیں ورتی دے:اداکارہ نرگس

اداکارہ نرگس نے صوبائی وزیر اطلاعات فیاض الحسن دی کلاس لے لی
 منسٹر صاحب! ہر بندہ عزت دار اے،کسے وی گھر بیٹھی سوانی بارے ایس طرحاں دے اکھر نہیں ورتی دے:اداکارہ نرگس

لاہور(پاکستان پوائنٹ نیوز30۔اگست۔2018ء) اداکارہ نرگس نے صوبائی وزیر اطلاعات فیاض الحسن چوہان دی کلاس لے لی۔ منسٹر صاحب! ہر بندہ عزت دار اے،کسے وی گھر بیٹھی سوانی بارے ایس طرحاں دے اکھر نہیں ورتی دے۔ تفصیل مطابق فیاض الحسن چوہان پنجاب دی صوبائی کابینہ دے بہت جھیڑوے(متنازعہ) وزیر بن کے ساہمنے آئے نیں۔اپنے غیر ذمے وارانہ بیان پاروں حکومتی خبراں دین والے وزیر آپ ای خبراں دیاں سُرخیاں بنن لگے نیں۔

صوبائی وزیر نے تھیڑ دی سابقہ اداکارہ نرگس بارے جھیڑوا بیان دتا۔ لاہور وچ اک تقریب دوران صوبائی وزیر دا کہنا سی کہ تھیڑ میرے انڈر ہوندا تے فیر میں نرگس نوں حاجی نرگس نہ بناندا تے فیر آکھدے۔تے اوہ سال دے 30نہیں بلکہ 300روزے نہ رکھدی تے فیر تُسیں آکھدے۔ ایس بیان اُتے اداکارہ نرگس دا ردعمل وی ساہمنے آ گیا اے۔ اداکارہ نرگس دا کہنا سی کہ شوبز نوں چھڈ چکی آں۔

نہ کسے نوں ڈسکس کرنی آں تے نہ چاہندی آں مینوں کوئی ڈسکس کرے۔ اداکارہ نے آکھیا کہ اک وزیر صاحب دا میرے بارے بیان ساہمنے آیا اے۔ وزیر صاحب تُسیں ذمے وار عہدے اُتے او، اپنے اکھراں دا چناؤ ٹھیک کرو۔ اداکارہ دا ہور کہنا سی کہ وزیر صاحب، ہر بندہ عزت دار اے ، کسے وی گھر بیٹھی سوانی بارے ایس طرحاں دے اکھر نہیں ورتی دے۔