نیویارک( پاکستان پوائنٹ نیوز07۔اگست۔2018ء ) جشن آزادی دی پریڈ وچ عاطف اسلم نوں بھارتی گانا گانا مہنگا پے گیا۔ تفصیل مطابق گلوکار عاطف اسلم نے نیویارک وچ جشن آزادی دی پریڈ وچ بھارتی گانا گایا۔ بھارتی گانا گان اُتے پاکستانی کیمونٹی نے احتجاج کردے ہوئے عاطف اسلم خلاف نعرے بازی کیتی۔ پاکستانی کمیونٹی نے تقریب وچ بھارتی گانا گان اُتے عاطف اسلم نوں ڈاڈھی تنقید دا نشانہ وی بنایا۔
لوکاں نے عاطف اسلم خلاف نعرے لاندے ہوئے منگ کیتی کہ عاطف اسلم تے اوہناں دے گانیاں دا بائیکاٹ کیتا جائے۔ عاطف اسلم دے بھارتی گانا گان اُتے کنسرٹ دے رلتی(شرکاء) رُس کے کنسرٹ وچے چھڈ کے چلے گئے۔ میڈیا رپورٹ مطابق عاطف اسلم نے کنسرٹ دوران ہتھ وچ پاکستانی جھنڈا پھڑن توں وی انکار کیتا سی۔ وکھالویاں(مظاہرین) دا کہنا سی کہ عاطف اسلم نے بھارتی گانا گا کے ساڈے جذبات نوں دُکھی کیتا۔ایہو ای نہیں عاطف اسلم نے پاکستانی جھنڈا پھڑن توں انکار کیتا جو مذمت جوگ اے۔ اسیں سارے منگ کرنے آں کہ ساری پاکستانی کمیونٹی عاطف اسلم تے اوہناں دے کنسرٹس دا بائیکاٹ کرے۔
