لاہور( پاکستان پوائنٹ نیوز04۔اگست۔2018ء ) اداکارہ عروہ حسین و ماورا حسین نے آکھیا اے کہ عمران خان دی شکل وچ ملک اندر تبدیلی آ گئی اے، آؤندا پاکستان پچھلے 70سال دے پاکستان توں وکھ ہوئے گا۔ اوہناں نے اک انٹرویو دوران آکھیا کہ عمران خان دے نظریے نوں نوجوان نسل نے پسند کیتا اے تے ایہو وجہ اے کہ 2018دے الیکشن وچ سبھ توں ودھ نوجواناں نے پی ٹی آئی نوں ووٹ دے کے کامیاب کروایا۔
اوہناں دا کہنا سی کہ پچھلے 70سال دی ترقی اک پاسے تے پی ٹی آئی دی پنج سال دی کارکردگی اک پاسے ہوئے گی۔ اوہناں نے آکھیاکہ عمران خان اک سچا تے کھرا لیڈر اے تے پوری قوم نے اوہدے اُتے اعتماد کیتا اے۔سانوں وی آس اے کہ عمران خان لوکائی دیاں آساں اُتے پورا اُترن گے تے ملکی خزانے لُٹن والیاں دا احتساب کرکے ملکی دولت واپس لیان گے۔ ملک اندروں بے روزگاری ختم کرن دے نال نال بجلی دا بحران ختم کرن گے۔ تعلیم ، صحت تے پین والے صاف پانی نوں پہلاں ترجیح دین گے۔ عروہ حسین تے ماورا حسین نے آکھیاکہ ہور سیاسی جماعتاں نوں وی ملکی مفاد دی خاطر پی ٹی آئی دیاں چنگیاں پالیسیاں دا ساتھ دینا چاہیدا ، تاں جے ملک ترقی ول ودھ سکے۔
