ممبئی(پاکستان پوائنٹ نیوز30۔جون2017ء) اُنج تے پاک بھارت کشیدگی دا دنیا بھر وچ چرچا اے۔ پاک بھارت دا کرکٹ میچ ہوئے یاں پاکستان تے بھارت دی فلم انڈسٹری، بھارت ہمیشہ ای اپنے آپ نوں پاکستان توں اُچا کرن دی کوشش کردا اے۔ پچھلے دِنا ای آئی سی سی چیمپئنز ٹرافی 2017 وچ پاکستان نے بھارت نوں ہرا کے فتح دا تاج اپنے سِر سجایا جہدے اُتے بھارتی اپنی ای کرکٹ ٹیم خلاف ہو گئے نیں پر ہن بالی ووڈ نے پاکستان دی میوزک انڈسٹری نوں وی نہیں چھڈیا تے گانے چوری کرنے شروع کر دتے۔
دلچسپ گل ایہ اے کہ پاکستان نال دشمنی دا راگ الاپن والے بھارت نے پاکستان وچ 1980دے دہاکے وچ ریلیز کیتا جان دا والا گانا نہ صرف چوری کیتا بلکہ اوہنوں بھارتی گلوکار میکا سنگھ دی آواز وچ ریکارڈ کروا کے اپنی فلم دا حصہ وی بنا لیا۔جی بالکل! بھارتی فلمسٹار ارجن کپور تے الینا ڈکروز دی نویں فلم ’مبارکاں‘ آن والے مہینے 27تاریخ نوں ریلیز کیتی جا رہی اے۔ پر ایس فلم دا گانا ’ہوا ہوا‘ پچھلے دیہاڑے ریلیز کیتا گیا جہنوں سُن کے پاکستانی سوشل میڈیا ورتیندڑاں نے چھیتی ای پہچان لیا کہ بھارت نے پاکستان دا گانا چوری کیتا اے۔ اصل وچ ایہ گانا 1980دے دہاکے وچ پاکستانی گلوکار حسن جہانگیر نے اپنی آواز وچ ریلیز کیتا سی۔ ایس گانے نوں اوس دور وچ وی بڑی مقبولیت ملی سی۔
