ممبئی(پاکستان پوائنٹ نیوز19۔اپریل2017ء) بھارتی گلوکار سونو نگھم نے ٹنڈ کروا لئی۔ تفصیل دے مطابق سونو نگھم دے اذان مخالف بیان اُتے اک مولوی نے فتوی دیندے ہوئے آکھیا کہ جہڑا بندا سونو نگھم دی ٹنڈ کرے تے اوہنوں جُتیاں دا ہار پوائے گا میں اوہنوں 10لکھ رُپئے انعام دیواں گا، جہدے جواب وچ سونو نگھم نے آکھیا کہ مولوی صاحب تُسیں اپنے دس لکھ رُپئے تیار رکھو میں اج ای اپنے گھر اک عالم نوں سَد کے اپنے وال کٹوا لینا واں۔
وعدے مطابق سونو نگھم نے میڈیا دی موجودگی وچ ٹنڈ کروائی۔ میڈیا نال گل بات کردے ہوئے سونو نگھم دا کہنا سی کہ لاﺅڈ سپیکر نہیں بلکہ اذان ضروری اے۔ ٹھیک اُنجے ای آرتی ضروری اے نہ کہ لاﺅڈ سپیکر۔ اوہناں دا کہنا سی کہ میں بہت سیکولر آں۔ میں اپنی ٹنڈ کروا دتی اے۔ ایہ کوئی چیلنج نہیں اے بلکہ اک درخاست اے کہ تُسیں انج دے بیاناں نال ایس ملک نوں کیہ بنا رہے او؟ میں ایہ نہیں آکھدا کہ میرا مذہب پرفیکٹ اے پر تہاڈا مذہب وی پرفیکٹ نہیں اے۔
اوہناں نے آکھیا کہ جیویں جہنے میری ٹنڈ کیتی اوہ اک مسلمان اے تے میں ہندو آں، میری کسے نال کوئی دشمنی نہیں اے۔ فتوی دی زبان نوں پیار دی زبان وچ بدلیا جا سکدااے۔ اوہناں دا کہنا سی کہ سیکولر ہون دا مطلب ایہ اے کہ اسیں اک دوجے نوں سمجھیے نہ کہ ایہ آکھیے کہ صرف میں ای سچا واں۔ اوہناں دا کہنا سی ہر اک نوں اپنے خیالاں دے اظہار دا حق اے تے میں اذان نہیں بلکہ لاﺅڈ سپیکر خلاف بیان دتا سی۔ اوہناں دا کہنا سی کہ میں اک سماجی مسئلا ساہمنے لیاندا جہنوں مذہبی رنگ دے دتا گیا اے۔ سونو نگھم نے ہور آکھیا کہ جدوں میں کیتے جاکے گیت گانا واں تے سرکاری اصولاں دے مطابق رات دس وجے توں پہلے گانا واں تے ایس گل نوں یقینی بنانا واں کہ اصولوں دی پیروی کیتی جائے۔
