(پاکستان پوائنٹ نیوز23۔جنوری2017ء) سام سنگ گلیکسی نوٹ 7موبائل ورتن والے ورتیندڑاوہدی بیٹری وچ اگ لگن دی وجہ توں ڈاڈھے پریشان سن، سام سنگ گلیکسی نوٹ 7وچ اگ لگن دیاں خبراں ساہمنے آن مگروں فلائٹس وچ وی سام سنگ گلیکسی نوٹ 7موبائل ورتن توں پرہیز کرن دا آکھیا جاندا سی جدکہ سام سنگ موبائل کمپنی اپنے موبائل بارے ایس طرحاں دیاں خبراں توں ڈاڈھی پریشان وی وکھائی دِتی۔
پچھلے ورھے 2ستمبر 2016نوں موبائل کمپنی سام سنگ نے عالمی مارکیٹاں توں اپنا سمارٹ فون گلیکسی نوٹ 7واپس منگوان دا فیصلا کیتا۔ جنوبی کوریا دی خبر ایجنسی ولوں جاری بیان وچ آکھیا گیا سی کہ موبائل کمپنی ولوں ایہ عمل سام سنگ دے سمارٹ فون گلیکسی نوٹ 7بارے ملن والیاں شکایتاں تے چارجنگ دوران ذکر کیتے گئے سمارٹ فون دی بیٹری دے پھٹ جان پاروں کیتا گیا سی۔
جہدے بعد بیٹری پھٹ جان بارے تحقیقات وی کیتیاں گئیاں۔ پر کمپنی ولوں جاری بیان وچ دسیا گیا کہ تحقیقات وچ ایہ گل ساہمنے آئی اے کہ سام سنگ گلیکسی نوٹ 7دی بیٹری پھٹ جان تے اوہدے وچ اگ لگن دی وجہ بیٹری دا ڈیزائن تے اوہدی مینوفیکچرنگ سی۔ کمپنی ولوں جاری بیان وچ دسیا گیا کہ 170بندیاں اُتے مشتمل اک سٹاف نے 30ہزار وادھو بیٹریاں دے نال نال دو لکھ موبائل فونز دا معائنا وی کیتا۔
ایس ضمن وچ تن انڈسٹری آرگنائزیشنز (UL,Exponent, TUV Rheinland) نوں وی ٹاسک دِتا گیا۔ ایس معائنے وچ نوٹ 7دا ہارڈویئر، سافٹ ویئر سنے لاجسٹک پہلوواں دا جائزا وی لتا گیا جہدے بعد آخیر ایہ گل ساہمنے آئی اے کہ ایس سارے معاملے دی ذمے وار صرف فون دی بیٹری اے۔ سام سنگ نے اپنے ورتیندڑاں نو ں یقین دہانی کروائی اے کہ ہن جدوں مسئلے دا پتا لا لیا گیا اے تے کمپنی کوالٹی نوں بہتر بنان لئی آن والے دِناں وچ ہور چنگے کم کرے گی۔
