اسلام آباد( پاکستان پوائنٹ نیوز25۔مئی2018ء ) وفاقی بجٹ دی منظوری مگروں مقامی کار بنان والیاں کمپنیاں نے نان فائلرز نوں گڈیاں ویچنیاں بند کر دتیاں نیں جدکہ گڈیاں دی بکنگ ویلے انکم ٹیکس گوشوارے جمع کروان دے نال نال فعال ٹیکس گزاراں دی لسٹ وچ وی شامل ہونا لازمی قرار دتا اے۔ میڈیا رپورٹس مطابق پاکستان وچ گڈیاں تیار کرن والیاں جاپانی کمپنیاں ولوں گڈیاں بک کروان والے اجیہے ورتینڈر(صارفین) جو ٹیکس گوشوارے جمع نہیں کرواندے اوہناں نوں صلاح دتی اے کہ گڈیاں دی ڈیلیوری توں پہلاں اپنے گوشوارے جمع کرا کے ٹیکس گزاراں دی لسٹ وچ شامل ہو جان تاں جے اوہناں نوں گڈیاں دی ڈیلیوری ویلے سِر کیتی جا سکے۔
کمپنیاں دا کہنا اے کہ گڈیاں مُل لین والے گاہکاں نوں اوس ویلے تیکر گڈی نہیں ملے گی جدوں تیکر اوہ اپنے گوشوارے جمع نہیں کرواندے تے گوشوارے جمع نہ کروان دی صورت وچ گڈی دی بکنگ رد وی ہو سکدی اے۔یاد رہوے کہ وفاقی حکومت نے بجٹ 2018-19وچ سی سی تے ایس توں ودھ طاقت دیاں گڈیاں د ی خریداری لئی ٹیکس گوشوارے جمع کروان نوں لازمی قرار دتا اے ، جیہدے نتیجے وچ وڈیاں گڈیاں دی وٹک (فروخت) متاثر ہون دے نال نال آٹو سیکٹر دی وٹک (فروخت) وی متاثر ہوسکدی اے۔
