لاہور(پاکستان پوائنٹ نیوز20۔اپریل2018ء) مشہور کار بنان والی کمپنی سوزوکی دی مشہور گڈی مہران نوں ٹکر دین لئی ہور دو گڈیاں مارکیٹ وچ آگئیاں نیں۔ آٹو پالیسی 2016-21دے تحت کئی مقامی تے بین الاقوامی آٹو کمپنیاں نے پاکستان وچ اپنا آپریشن شروع کر دتا اے۔ جیہدے وچ یونائیٹڈ آٹوز تے نسان نمایاں نیں۔ ایہ دوویں کمپنیاں پاکستان وچ اک مسافر گڈی لانچ کرن والیاں نیں جو سوزکی کمپنی دی مہران گڈی نوں ٹکر دین گیاں۔
مہران پچھلے تن دہاکیاں توں مقامی مارکیٹ دی سبھ توں مقبول گڈی رہی اے، کئی ورھیاں وچ اسیں ایہو سُندے آر ہے آں کہ سوزوکی اپنی مہران گڈی دی مینوفیکچرنگ روکن بارے غور کر رہی اے پر اجے انج نہیں ہویا۔ تنقید تے خامیاں مگروں وی سوزوکی کمپنی نے 2017وچ مہران دے 42ہزار توں ودھ یونٹس ویچے۔ پر ہن مارکیٹ وچ دو نویاں 800سی سی گڈیاں لیاندیاں جان گیاں۔
جیہناں وچ یونائیٹڈ آٹوز دی ’براوو(Bravo‘ تے ڈاٹس کمپنی دی (Redi-Go)شامل اے۔ پر ریڈی گو دی لانچ بارے اجے تصدیق ہونی اے۔ نسان کمپنی نے ڈاٹس برانڈ نوں 1998وچ ختم کر دتا سی پر ڈاٹسن گو دی 2012وچ لانچ مگروں اوہنوں بحال کیتا گیا۔ ڈاٹسن گو نوں 2016وچ لانچ کیتا گیا۔ جیہدے وچ کمپنی نے 0.8لیٹر دا انجن متعارف کروایا۔ ایس ماڈل دی مقبولیت مگروں کمپنی نے ایس ماڈل وچ 1.0لیٹر دا انجن وی متعارف کروایا۔
اوہدی لمبائی mm3439، چوڑائیmm1560، اُچیائیmm1541تے وہیل بیس mm2348اے۔ گڈی اک ای لیٹر پٹرول وچ 25کلو میٹر پینڈھا طے کر سکدی اے۔ جدکہ اوہدے فیول ٹینک وچ 35لیٹر پٹرول آ سکدا اے۔ ایس گڈی دی خاص گل ایہ اے کہ ایہدے وچ ائر بیگز وی ہون گے تے ایہ سہولت سوزوکی مہران وچ نہیں اے۔ کمپنی پاکستان وچ ڈاٹس گو تے ڈاٹس گو پلس وی متعارف کروان دا سوچ رہی اے۔
