امریکا(پاکستان پوائنٹ نیوز06۔دسمبر2017ء) ورچوئل کرنسی بٹ کوائن نے پہلی وار 12ہزار 500ڈالرز دی حد پار کر لئی اے، جہدے مگروں اک سکے دی قیمت ریکارڈ سطح اُتے پہنچ گئی۔تفصیل مطابق ورچوئل کرنسی بٹ کوائن نے پہلی وار 12ہزار 500ڈالرز دی حد پار کر لئی اے۔ایس ویلے انٹرنیٹ دی دنیا دی ایس کرنسی دے اک یونٹ یاں اِنج آکھ لوو کہ اک سکے دی قیمت 12ہزار 500ڈالر (13لکھ 18ہزار437رُپئے) اُتے پہنچ گئی اے۔
یعنی اک بٹ کوائن نال 26تولے توں ودھ سونا مُل لیا جا سکدا اے۔ ایس توں پہلاں پچھلے مہینے بٹ کوائن دی قیمت 9ہزار 656ڈالر وی سی۔دوجے پاسے کُجھ دن پہلاں ہیج فنڈ دے لیجنڈ مائیک نووگراٹنر دا کہنا سی کہ 2018دے آخیر تیکر ورچوئل کرنسی بٹ کوائن دی قیمت 40ہزار ڈالر تیکر اپڑ جائے گی۔ اوہناں نے آکھیا کہ بٹ کوائن دی قیمت آوٴندے 13مہینیاں وچ تقریبن چار گنا توں ودھ سکدی اے۔
مزے دی گل ایہ اے کہ بٹ کوائن دی قیمت پچھلے ورھے مئی وچ صرف 443ڈالرز سی تے اک سال وچ اینا وادھا حیرانگی دی گل اے۔ ایہ بٹ کوائن لئی اک نیل پتھر اے کیونکہ اوہنوں ڈیجیٹل گولڈ وی قرار دتا جاندا اے۔ کسے حقیقی کرنسی د ے مقابلے وچ بٹ کوائن ہر طرحاں دے ضابطیاں یاں حکومتی کنٹرول توں آزاد اے۔ تے اوہدی ورتوں بہت آسان اے۔ ایس ویلے ایہنوں کئی ملک کینیڈا‘ چین تے امریکا وغیرہ وچ ورتیا جا رہیا اے پر دنیا وچ انٹرنیٹ تیکر پہنچ رکھن والا ہر بندہ ایس کرنسی نوں مْل لے سکدا اے۔
