لاہور:تباہ ہوئیاں جاپانی گڈیاں تیار کر کے مہنگے ریٹ اُتے ویچے جان دا انکشاف

لاہور:تباہ ہوئیاں جاپانی گڈیاں تیار کر کے مہنگے ریٹ اُتے ویچے جان دا انکشاف

لاہور(پاکستان پوائنٹ نیوز23۔ستمبر2017ء) پاکستان وچ تباہ ہوئیاں گھٹ قیمت جاپانی گڈیاں لوکاں نوں مہنگیاں ویچے جان دا انکشاف ہویا اے۔ تفصیل مطابق کجھ دن پہلے سوشل میڈیا اُتے پاکستان وچ لیاندیاں جان والیاں استعمال شدہ جاپانی گڈیاں دیاں کُجھ تصویراں ساہمنے آئیاں۔ ایہناں تصویراں وچ جاپانی گڈیاں بہت مندے حال وچ ویکھیاں جا سکدیاں نیں۔ ایس حوالے نال سوشل میڈیا اُتے بحث جاری سی کہ کیہ ایہ اوہی گڈیاں نیں جہناں نوں مرمت مگروں مہنگے ریٹ اُتے ویچیا جاندا اے؟ ایس حوالے نال ہن ’اُردو پوائنٹ‘ دی اُچیچی ٹیم ولوں تحقیق کیتی گئی اے۔

تحقیق وچ ایہ گل ساہمنے آئی اے کہ استعمال ہوئیاں امپورٹڈ گڈیاں نوں ویچن دے کاروبار نال جُڑے ڈیلرز باہرلے ملک خاص کر جاپان توں پاکستان منگواندے نیں تے فیر ایہناں گڈیاں نوں ایتھے مرمت کر کے اجیہا بنا دیندے نیں کہ اوہ نویاں ہو جاندیاں نیں۔ ایہناں گڈیاں دی مرمت دا کم بہتا کراچی وچ ہوندا اے۔ ایہ تباہ ہوئیاں گڈیاں سستیاں منگوائیاں جاندیاں تے فیر مرمت مگروں ایہناں نوں مہنگے ریٹ اُتے ویچیا جاندا اے۔ ایہناں تفصیلاں دے ساہمنے آن مگروں سوال پیدا ہوندا اے کہ کیہ ملک اندر کوئی اجیہا سرکاری ادارہ نہیں جو ایس ساری صورتحال اُتے نظر رکھ کے اجیہیاں گڈیاں دی قیمت نوں اک خاص حدوں ودھن نہ ہون دیوے؟