برسبین(پاکستان پوائنٹ نیوز13۔جنوری2017ء) آسٹریلیا نے پاکستان نوں 5ون ڈے میچاں دی سیریز دے پہلے میچ وچ جِت لئی 269سکور دا ہدف دے دِتا اے۔تفصیل دے مطابق برسبین دے وولن گابا سٹیڈیم وچ جاری میچ وچ آسٹریلیا ولوں ڈیود وارنر تے ٹریوس ہیڈ نے اننگز دی شروعات کیتی، 5ویں اوور وچ محمد عامر نے وارنر نوں 7سکور اُتے شاندار گیند کردے ہوئے کلین بولڈ کر دِتا تے اگلی ای گیند اُتے سٹیو سمتھ نوں وی وکٹاں پچھے محمد رضوان ہتھوں کیچ آﺅٹ کرا دِتا۔
52دے مجموعی سکور اُتے حسن علی نے سلو ڈلیوری اُتے کرس لین نوں آﺅٹ کیتا، ٹریوس ہیڈ 39دے انفرادی سکور اُتے عماد وسیم دی گیند اُتے وکٹاں پچھے کیچ آﺅٹ ہوگئے، مچل مارش وی چار سکور بناکے عماد وسیم دی گیند اُتے رضوان ہتھوں کیچ آﺅٹ ہوئے، میکسویل تے ویڈ نے 6ویں وکٹ لئی 82سکور دا وادھاکیتا جہدے بعد میسکویل 60سکور بنا کے حسن علی دا شکار بنے، جیمز فالکنر صرف 7سکور بناکے محمد نواز دی گیند اُتے محمد حفیظ ہتھوں کیچ آﺅٹ ہوئے، ویڈ تے کمنز نے 8ویں وکٹ لئی 42سکور کیتے جہدے بعد کمنز 15سکور بنا کے رن آﺅٹ ہوگئے، مچل سٹارک نوں 10سکور اُتے حسن علی نے کلین بولڈ کیتا۔
ایس توں پہلے آسٹریلیا دے کپتان سٹیو سمتھ نے پاکستان خلاف ٹاس جِت کے پہلے بیٹنگ کرن دا فیصلا کیتا۔ آسٹریلیا ولوں دو کھڈاری کرس لین تے بلی سٹین ون ڈے ڈیبیو کر رہے نیں جدکہ پاکستانی ٹیم وچ شعیب ملک دی تھاں محمد حفیظ نوں کھڈایا گیا اے، عمر اکمل وی تقریبن دو ورھیاں بعد ون ڈے میچ کھیڈ رہے نیں۔
