اسلام آباد(پاکستان پوائنٹ نیوز20۔جنوری2017ء) سپریم کورٹ وچ پاناما لیکس دی سنوائی آن والے ہفتے پیر دی سویر تک ملتوی کر دِتی گئی اے۔ تفصیل دے مطابق سپریم کورٹ وچ پاناما لیکس بارے درخاستاں دی سنوائی دا سلسلا جاری اے۔ اج سپریم کورٹ وچ پاناما لیکس دی سنوائی دے دوران جماعت اسلامی دے وکیل توفیق آصف نے دلائل دِتے، جہدے بعد کیس دی ہور سنوائی پیر دی سویر تک ملتوی کر دِتی گئی۔
سپریم کورٹ دے باہر میڈیا نال گل بات کردے ہوئے پی ٹی آئی رہنما نعیم الحق دا کہنا سی کہ کرپشن خلاف ہمیشہ آواز چُکاں گے۔ اوہناں نے آکھیا کہ پاکستان تحریک انصاف گالھاں کڈھن دے خلاف اے اسیں کدی ذاتی حملے نہیں کیتے تے نہ ای کراں گے۔ نعیم الحق دا کہنا سی کہ حکومتی نمائندیاں نے سپریم کورٹ دے ممکنا فیصلے خلاف دھمکی دِتی۔ حکومتی نمائندے دے بیاناں دی نندیا کرنا واں۔
نعیم الحق نے آکھیا کہ میں امید کرنا واں کہ ایہ دھمکیاں تے اپنی زبان نوں کنٹرول کرن گے۔ اوہناں دا کہنا سی کہ جدوں انصاف دی راہ وچ اوکڑاں پائیاں گئیاں تے پی ٹی آئی ہمیشہ دی طرحاں اپنیاں کوششاں جاری رکھے گی۔ نعیم الحق نے میڈیا نال گل بات وچ ہور آکھیا کہ اسیں اپنے خدشیاں تے سفارشاں توں لوکائی نوں آگاہ کردے رہواں گے۔ اوہناں نے دسیا کہ اج بابر اعوان دی رہنمائی وچ شہباز شریف دی نااہلی لئی درخاست جمع کراواں گے۔اوہناں دا کہنا سی کہ اسیں ساریاں غلط گلاں لئی قانونی چارا جوئی کردے رہواں گے۔ اوہناں نے آکھیا کہ تحریک انصاف ظلم تے نفرت خلاف آواز چُکدی رہوے گی۔ پی ٹی آئی رہنما نے ہور آکھیا کہ سپریم کورٹ سچ تے حق دا جلدی ای فیصلا سنائے گی۔
