اسلام آباد(پاکستان پوائنٹ نیوز26۔جنوری2017ء) پاکستانی آرٹسٹ عدنان صدیقی نے بھارت ولوں ویزا ملن اُتے خشی دا وکھالا کردے ہوئے آکھیا اے کہ انج لگ رہیا اے کہ ویزا نہیں، جنت دا ٹکٹ مل گیا ہووے۔تفصیل دے مطابق بی بی سی نال گل بات کردے ہوئے عدنان صدیقی نے دسیا کہ اوہ آن والے مہینے بھارت جان گے۔ عدنان دا ایس حوالے نال کہنا سی کہ ویزا ملن مگروں جس طرحاں فون آ رہے نیں، لوک آکھ رہے نیں کہ’ مبارک ہووے تہانوں ویزا مل گیا‘ مینوں تے انج لگ رہیا اے کہ ویزا نہیں، جنت دا ٹکٹ مل گیا ہووے۔
عدنان دا کہنا سی کہ’ موم‘ توں پہلے وی کئی فلماں دی آفر ہوئی پر ایہ فلم سری دیوی بنا رہیاں نیں جو ایس طرحاں دیاں آرٹسٹ نیں جہناں نوں نہ صرف انڈیا بلکہ دنیا بھر وچ جانیا جاندا اے۔ اک سوال دے جواب وچ عدنان صدیقی دا کہنا سی کہ شوبز دا تعلق سیاست نال نہیں ہونا چاہیدا، پر جدوں ملکاں وچکار ایس طرحاں دے تعلقات ہون تے اوہدی وچ بہت ساریاں شیواں ہور وی آ جاندیاں نیں۔ جدوں عدنان توں پُچھیا گیا کہ اوہ ممبئی جا کے مہاراشٹر دے وزیر اعلا دیویندر پھڈ نویس تے راج ٹھاکرے نال ملاقات کرن گے؟ جواب وچ عدنان دا کہنا سی کہ جے اوہ مینوں ملنا چاہندے نیں تے میں ضرور اوہناں نال ملاں گا۔ عدنان نے امید دا وکھالا کیتا کہ پاکستان تے بھارت وچکار تعلقات وچ جلدی بہتری آجائے گی۔
