ممبئی(پاکستان پوائنٹ نیوز09۔اکتوبر۔2018ء) بالی ووڈ دے دبنگ اداکار سلمان خان دی ماضی دی اِک ویڈیو وائرل ہو رہی اے جیہدے وچ اوہ اداکار ہا یشوریا رائے اُتے تشدد بارے وضاحت دیندے نظر آ رہے نیں۔ ماضی وچ بالی ووڈ دے سلطان سلمان خان تے ملکہ حسن ایشوریا رائے بچن دے عشق دے قصے ہر زبان اُتے سن پر ایس طوفانی تے دھواں دار عشق دا انجام بہت دُکھ بھریا ہویا سی۔
2002 وچ دِتے گئے اِک انٹرویو وچ ایشوریا نے سلمان خان اُتے تشدد دا الزام لاندیاں ہویاں کہیا سی کہ سلمان خان اوہناں نُوں فون کر کے نہ صرف بہت ای فضول گلاں سناندے نیں سگوں اوہناں نے میرے اُتے میرے ساتھی اداکاراں نال تعلقات دا الزام وی لایا سی تے اِک واری تے سلمان خان نے میرے اُتے تشدد وی کیتا پر خُش قسمتی نال ایس تشدد دے کوئی نشانات میرے جسم اُتے نہیں آئے تے میں انج ظاہر کیتا جیویں کجھ ہویا ای نہیں۔
ایس واقعے دے بعد سلمان خان نال تعلقات ختم کر لئے۔ ایس حوالے نال سلیمان خان دے ماضی دے انٹرویو دی اِک ویڈیو وائرل ہو رہی اے جیہدے وچ اوہ ایشوریا اُتے تشدد بارے وضاحت دیندے نظر آ رہے نیں۔ سلمان خان نے صحافی ولوں پُچھے جان والے سوال دے جواب وچ کہیا کہ کُجھ سال پہلے اِک ہور صحافی نے میرے توں ایہو سوال پُچھیا سی تے میں ٹیبل نُوں مارنا شروع کر دِتا تے ٹیبل ٹُٹ گیا‘ میرے کہن دا مطلب اے جے میں واقعی ایشوریا نُوں ماریا ہوندا تے اوہ زندا نہ بچدی۔
