دبئی(پاکستان پوائنٹ نیوز26۔فروری2018ء) دبئی قونصل خانے مطابق سری دیوی دی موت دبئی دے ہوٹل وچ ہوئی۔ اداکارہ سری دیوی بے ہوشی دا دورہ پین دی وجہ توں باتھ روم وچ ڈِگیاں ، جہدے مگروں اوہناں نوں ہسپتال منتقل کیتا گیا ۔ ایس توں پہلاں خبراں آ رہیاں سن کہ سری دیوی دی موت دل دا دورہ پین نال ہوئی۔ دوجے پاسے ہوٹل انتظامیہ نے سری دیوی دی موت اُتے گل بات کرن توں معذرت کیتی اے۔
ہوٹل دے اک ملازم دا کہنا اے کہ سری دیوی دی موت بارے پولیس تحقیقات کر رہی اے۔ بھارتی قونصل خانے مطابق سری دیوی نوں جدوں ہسپتال لیاندا گیا تے اوہ زندہ نہیں سن۔ سری دیوی دی لاش قانونی کارروائی مکمل ہون مگروں گھر والیاں دے حوالے کیتی جائے گی۔ بھارتی قونصل خانے مطابق سری دیوی دا پوسٹ مارٹم ہو گیا اے۔ خلیجی اخبار مطابق سری دیوی دی لاش نوں اُچیچے جہاز راہیں بھارت لیاندا جائے گا۔ سری دیوی دی موت 55سال دی عمر وچ ہوئی۔
