لاہور(پاکستان پوائنٹ نیوز03۔نومبر2017ء) آسکر انعام جیتو فلم ڈائریکٹر شرمین عبید چنائے دا فلم ’سیونگ فیس‘ دی مرکزی کردار رخسانہ بی بی نوں دھوکھا دین دا سکینڈل ساہمنے آ گیااے، شرمین نے 7ورھیاں مگروں وی وعدہ پورا نہ کیتا، رخسانہ دے مونہ دی سرجری کروائی، 5مرلے دا گھر لے کر دتا تے نہ ای 30لکھ رُپئے دتے، فلم سیونگ فیس نے شرمین عبید چنائے دی شہرت نوں چار چن لا دتے، جدکہ مرکزی ایکٹر دی دنیا ای ویران کر دتی، سوہریاں تے پیکیاں نے وی مونہ موڑ لیا۔
قومی اخبار دی اک رپورٹ مطابق فلم سیونگ فیس دی مرکزی اداکار رخسانہ بی بی نے دسیا کہ 2009-10وچ اے ایس ایف اسلام آباد وچ تیزاب گردی تے مونہ ساڑے جان کارن زیر علاج سی کہ اوتھے ڈائریکٹر شرمین عبید چنائے آئی تے مینوں فلم بنان دا آکھیا۔ شرمین نے کئی وار اسلام آباد وچ شوٹنگ کیتی مینوں میرے جدی گھر میر ہزار خان مظفر گڑھ وچ لیجایا گیا ۔رخسانہ بی بی دا کہنا سی کہ شرمین نے میرے نال وعدہ کیتا کہ میں تہاڈی سرجری کروان دے نال نال تہانوں ملتان وچ 5مرلے دا مکان وی لے کر دیواں گا ایس توں وکھ 30لکھ رُپئے وی دتے جان گے۔
رخسانہ دا کہنا سی کہ میں اپنے گھر والیاں دے ڈر توں فلم کرن توں انکار کیتا سی۔ پر اینی وڈی آفرز کارن نہ چاہندے ہوئے وی سہانے مستقبل تے بالاں خاطر فلم وچ کم کرن بارے راضی ہو گئی تے دل لا کے کم کیتا۔ فلم وچ میرے نال اک ہور تیزب توں متاثر ذکیہ ناں دی سوانی وی سی جہدا تعلق لیہ توں سی۔پر سانوں دلاسیاں توں وکھ کُجھ نہیں دتا گیا۔
