اسلام آباد(پاکستان پوائنٹ نیوز17۔جنوری2017ء) پاکستان دے نعت خواں و مبلغ جنید جمشید دی زندگی دے کُجھ پَلاں نوں قید کر کے اوہناں دے دوستاں تے پاکستان دے مشہور گلوکار سلمان احمد نے اک فلم بنائی جہنوں جنید جمشید دے چاہیواناں ولوں سلاہیا گیا پر مائیکرو بلاگنگ ویب سائٹ ٹویٹر اُتے اپنے پیغام وچ جنید جمشید دے بھارتی چاہیوان نے سلمان احمد نال گِلہ کیتا کہ اوہ جنید جمشید دی زندگی اُتے بنی فلم نہیں ویکھ سکدے۔
اوہناں نے سلمان احمد نوں آکھیا کہ ایس فلم نوں یوٹیوب نے بھارت وچ بلاک کر دِتا اے۔ جہدے جواب وچ سلمان احمد نے آکھیا کہ ایس فلم اُتے بھارت وچ پابندی لان دی اک وجہ ایہ وی ہو سکدی اے کہ ایہدے وچ پاکستانی ثقافت نوں وکھایا گیا اے۔ سلمان احمد ولوں ریلیز کیتی گئی ایس فلم ’خواب‘ وچ جنید جمشید دی زندگی دے مختلف پَلاں نوں شامل کیتا گیا اے۔ یاد رہوے کہ پی آئی اے دی تباہ ہون والی اُڈان پی کے 661وچ جنید جمشید تے اوہناں دی بیوی وی سوار سی۔ ذکر کیتے گئے حادثے وچ جنید جمشید، اوہناں دی بیوی تے جہاز دے عملے سنے 47بندے شہید ہو گئے سن۔
