لاہور(پاکستان پوائنٹ نیوز18۔جنوری2017ء) فلمسٹار شان نے پاکستانی فلماں دی بھارت وچ نمائش بارے وزیر اعظم نوں تجویز پیش کر دے ہوئے ایس گل اُتے زور دِتا اے کہ پاکستانی فلماں نوں بھارت وچ نمائش لئی پیش کیتا جائے۔ تفصیل وزیر اعظم نواز شریف نے سینما مالکاں نوں مالی کسارے توں بچان لئی پاکستانی سینما گھراں وچ بھارتی فلماں دی نمائش لئی اک کمیٹی بنا دِتی جہدے بعد شان شاہد نے وزیر اعظم نوں ایس گل اُتے زوردِتا کہ پاکستانی فلماں دی وی بھارتی سینما گھراں وچ نمائش نوں ممکن بنایا جائے۔
اوہناں نے اپنے بیان وچ آکھیا کہ جدوں پاکستان وچ بھارتی فلماں دی نمائش اُتے لگی پابندی ختم کیتی جا سکدی اے تے بھارتی سینما گھراں وچ وی پاکستانی فلماں دی نمائش اُتے اک کمیٹی بنائی جانی چاہیدی۔ اپنی فیس بک پوسٹ اُتے شان شاہد نے لکھیا کہ میری وزیر اعظم توں گزارش اے کہ جے تُسیں پاکستان وچ بھارتی فلماں دی نمائش لئی اک کمیٹی بنا رہے او تے برائے مہربانی بھارتی سینما گھراں وچ پاکستانی فلماں دی نمائش لئی وی اک کمیٹی بنا ئی جائے۔ کیونکہ ثقافت نوں صرف درآمد نہیں بلکہ برآمد وی کیتا جانا چاہیدا۔
