نیویارک۔ 22ستمبر (اے پی پی) میانمر نا کسرشون آنگ سان سوچی اقوام متحدہ نا جنرل اسمبلی ٹی تران کرسا پارے کہ او میانمر نا ریاست راکیھن اٹی انسانی حق انا مون آ دننگ نا عزم تخک و ہموجاگہ نا اصل حق آتا جاچ اکن کوفی عنان نا سروکی ٹی اڈ تروک کمیشن ءِ فعال کننگ کن پبی گام گیج چست کننگک۔ آنگ سان سوچی ہرانا اقوام متحدہ نا جنرل اسمبلی آن پنچ شنبے آ بطور کسرشون اولیکو تران ئس تینا تران اٹی روہنگیا مسلمان تا پن ءِ ہلنگ آن بیدس پارے کہ او ریاست راکیھن اٹی انسانی حق انا پامالی تا جاست و پاست کن کمیشن ءِ بحال کیک اوپارے کہ میانمار اٹی کمیشن نا جوڑ کننگ نا برخلاف گڑاس حلقہ غاتیان پدریسہ مخالفت نا مون تروکی ءِ ولے نن راکیھن نا شونہالی و ہموڑے رواداری و امن نا اڈتننگ کن پرعزم اُن۔
اوپارے کہ میانمار بنداوی انسانی حق انا شرف ءِ کیک و عدم برداشت نا رویہ غاتا برخلاف ءِ۔ ریاست راکیھن اٹی مسلم روہنگیا آبادی بدھ مت بنداو پرست آتا زیر عتاب ءُ و ہموڑے تینا اُراتے ہلسا چار سال آن بے کچ بے چیٹی حالیت آتیٹی عارضی کیمپ آتیٹی رہینگ انگ ءُ ، میانمار نا حکومت اوفتے تینا شاری تکپک۔
