نیویارک(پاکستان نیوز پوائنٹ 22ستمبر 2016ء) وزیراعظم محمد نواز شریف اقوام متحدہ نا سیکرٹری جنرل بان کی مون تون نیویارک اٹی اوڑدہی کرے ہرانا وخت آ وزیراعظم کشمیر نا ویل ءِ چست کرے و جہانی ادارہ نا سروک ءِ مقبوضہ کشمیر اٹی بھارت نا دوتے اٹ کودک شاری تا تپاخت نا ثبوت تس وخت اس کہ اودے ریاستی دہشت گردی نا گواچی بے گناہ و کودک خلقت آتا عکس آتے نشان تس۔
بان کی مون کوزہ گر بھارتی فورسزآتا کنڈآن پیلٹ گن انا کاریم اٹ اتوک آ بیدادی و بربریت نا عکس آتے ہرسا افسوز و ڈکھ نا درشانی ءِ کرے۔ وزیراعظم مقبوضہ کشمیر نا حالیت آتا بابت بان کی مون نا بیان آمنت واری ءِ اداکرے۔ وزیراعظم تدینگوک آ 74دے اٹی مقبوضہ کشمیر اٹی 100 بندغ نا شہیدی واو پیلٹ گن آتا بے دریغ کاریم اٹ اتنگ آن معلومدار کرے ہرانا سوب سد آ بندغ آک کورمسنو۔
وزیراعظم بھارتی سیکورٹی فورسز آتا دوتے اٹ ہزار آ ٹھپی بندغ آتا بارواٹی پارے کہ پیلٹ گن آتا ناجائز کاریم اٹ اتنگ آن سد آ نیاڑی و چناک خن تا روشنائی آن محروم مسنووخت اس کہ پیلٹ گن آتا کاریم اٹ اتنگ غیر انسانی و صاف ءُ بربریت اسے۔ وزیراعظم اقوام متحدہ نا سیکرٹری جنرل ءِ مقبوضہ کشمیر اٹی پدریسہ کرفیو، کشمیری کسرشون تا دزگیری، ٹھپی مروک آتا درمان آن انکار خاص وڑاٹ خن تیان زہمی و پیلٹ گن آتا سم کاری نا گواچی بندغ آتا درمان ءِ کرفپننگ نا بھارتی روش نا بارواٹی پارے۔
وزیراعظم محمد نواز شریف تینا چھٹی ٹی سلامتی کونسل نا پنچ باسک ملک آتا سروک، جہانی برادری و اقوام متحدہ نا سیکرٹری جنرل نا توجوہ ءِ کشمیر نا حالیت آتیا مبذول کرفینے۔ اوبان کی مون آن خواست کرے کہ مقبوضہ کشمیر اٹی ماورائے عدالت مرک آتا جاست وپاست کرفنگے و اقوام متحدہ نا فیکٹ فائنڈنگ مشن مقبوضہ کشمیر اٹی حالیت آتا جاست وپاست ءِ کے۔ اوڑدہی نا وخت بان کی مون ءِ مقبوضہ کشمیر اٹی بھارت نا انسانی حق انا خلاف ورزی تا ثبوت ہم تننگا۔ وزیراعظم زورشاغاکہ بھارت ءِ سلامتی کونسل نا قرارداد آتیا عملدرآمد نا پابند جوڑ کننگے۔ سیکرٹری جنرل اقوام متحدہ ٹی پاکستان نا اہم و متحرک کڑد انا ستاءِ کرے و دنیا ٹی امن و سوگوی کن پاکستان نا کوشست آتا ستاءِ کرے۔
