لندن(پاکستان نیوزپوائنٹ23ستمبر2017ء) وزیراعظم شاہد خاقان عباسی بے کچ اختہ انگا دورہ غان پد نیویارک آن لندن آ سرمس ۔ اقوام متحدہ نا جنرل اسمبلی نا 72می دیوان اٹی شرکت کن وزیراعظم شاہد خاقان عباسی نیویارک آ ہناسس، داوخت آ او چندی جہانی راہشون آتون ہم اوڑدہی کرے و دہشت گردی نا برخلاف پاکستان نا کڑد ءِ ہم تالان کرے۔ وزیراعظم شاہد خاقان عباسی نا اقوام متحدہ نا اولیکو دورہ ٹی اونا بے کچ اختہ شیڈول مس و او چندی جہانی راہشون آتون اسٹ آن پد ایلو اوڑدہی تیان بیدس جنرل اسمبلی نا دیوان و او آئی سی رابطہ رڑآن تران ہم کرے و میڈیا ءِ ہم انٹرویو تس۔
دورہ ٹی اوامریکہ ، برطانیہ ، اردن ، ترکی، نیپال ، ایران و سری لنکا نا راہشون آتون ہڑتوم آ کنڈآتا معاملہ غاتیا ہیت وگپ کرے۔ داکان بیدس او چندی فورم تیا پاکستان نا مقدمہ ءِ ہم جوان وڑاٹ پیش کرے۔ دورہ ٹی پیلس ہوٹل اٹی تروک آ بیا بخیری ٹی امریکی صدر ڈونلڈ ٹرمپ اتون ہم اونا غیر رسمی ہیت وگپ مس،ہراٹی او امریکی صدر ءِ معلومدار کرے کہ پاکستان دہشت گردی نا برخلاف جنگ اٹی امریکہ نا سیوتی ءِ۔
وزیراعظم شاہد خاقان عباسی پارے کہ اودے امریکی صدر نا کنڈآن جوان ورندی ملا۔ داکان مست امریکی نائب صدر مائیک پنس اتون اوڑدہی ٹی ہڑتوم آ ملک آک غلط فہمی تا ازالہ کن مذاکرات ءِ برجاتخنگ آ امنا کریر۔ اقوام متحدہ نا جنرل اسمبلی آن تینا تران اٹی او ادارہ نا 193باسک ملک آتا نمائندہ غاتے پارے کہ دہشت گردی نا برخلاف جنگ اٹی پاکستان آن زیات قربانی ہچ گہس تتنے۔
اوغانستان نا بارواٹی پاکستان نا موقف ءِ دنیا نا مون آ صفا کرے اوپارے کہ پاکستان اوغان جنگ اکن تینا گل زمین ءِ کاریم اٹ اتنگ نا موکل تفک۔ وزیراعظم اقوام متحدہ نا سیکرٹری جنرل آن خواست کرے کہ جموں وکشمیر نا بابت اقوام متحدہ نا سلامتی کونسل نا قرارداد آتیا عملدرآمد کن دمدستی گام گیج کننگے۔ اوپاکستان و بھارت نا نیام اٹ دا متکن آ جھیڑہ نا پرامن و منصفانہ ایسری کن خصوصی نمائندہ اس پن کننگ آ ہم زور شاغا۔
اوپارے کہ جہانی برادری ءِ بایدے مرے کہ حالیت آتے خطرناک مننگ آن بچفنگ کن کڑد ادا کے۔ وزیراعظم بھارت نا کوزہ ٹی کشمیر اٹی کوزہ گر فوج انا کنڈآن کشمیری تے اوفتا حق خودارادیت نا دوئی کن جہد آن توننگ کن کروک آ بیدادی نا کنڈآہم دنیا نا چکار ءِ کرفے و او انسانی حق انا خلاف ورزی تا بابت شاہدی ہم اقوام متحدہ نا سیکرٹری جنرل نا حوالہ کرے۔ اوجنرل اسمبلی ءِ پارے کہ پاکستان بھارت تون غٹ متکن آ جھیڑہ غاتا ایسری کن تیار ءِ ولے داڑکن بھارت ءِ پاکستان نا برخلاف ریاستی پشت پناہی آن مروک آ دہشت گردی ءِ چٹفوئی مریک۔
وزیراعظم پاک امریکہ بزنس کونسل ناکنڈآن خصوصی وڑاٹ تروک آ سوارہ ٹی ہم شرکت کرے ہراٹی امریکی زرکار و پوریاگر آتون اونا اوڑدہی مس۔ اوپاکستان اٹی زرکاری کن ساز گار چاگڑد آن زرکار آتے معلومدار کرے وپارے کہ پاکستان زرکاری کن زبردست ءُ ملک اسے۔ اقوام متحدہ ٹی پاکستان نا سفیر ڈاکٹرملیحہ لودھی ”اے پی پی “ ءِ پارے کہ وزیراعظم تینا دورہ آن بھاز است جم ءِ۔
اوپارے کہ دادورہ آن امریکہ تون پاکستان نا تعلقداری تے ٹریک آ پدی اتنگ اٹی کمک رسینگانے۔ وزیراعظم دورہ ٹی کونسل آف فارن ریلیشنز آن تران کرسا صفا کرے کہ پاکستان اسٹ انگا ملک ءِ ہرا انتہاء پسندی و دہشت گردی نا برخلاف پورو وڑاٹ سرگرم ءِ و اونا 2لکھ آن زیات فوجی دہشت گردی و انتہاء پسندی نا چٹفنگ اٹی اختہ ءُ۔ وزیراعظم شاہد خاقان عباسی ءِ سپارنگ کن اقوام متحدہ ٹی پاکستان نا سفیر ڈاکٹر ملیحہ لودھی و پاکستانی سفیر اعزاز چوہدری ہم ساڑی ئسر۔ وزیراعظم وطن آ پدی بننگ آن مست لندن اٹی مریک ہراڑے او وطن آ پدی بننگ آن مست مسکوہی وزیراعظم محمد نواز شریف تون ہم اوڑدہی کیک۔
