نیویارک(پاکستان نیوزپوائنٹ22ستمبر2017ء) وزیراعظم شاہدخاقان عباسی پارینے کہ امریکہ نا دورہ بھاز جوان مس ، پاکستان نا موقف ءِ بھاز گچین وڑاٹ پیش کریٹ، کشمیر نا معاملہ غا پاکستان ناموقف ءِ پبی وڑاٹ پیش کریٹ، امریکی صدر تون سوارہ غا غیر رسمی اوڑدہی اس مس، چندی ملک آتا سروک آتون اوڑدہی مس ، پاکستان اٹی جمہوریت نا سوگوی ءِ دنیا امنا کرینے۔
اوغانستان اٹی جنگ انا کمک اٹ امن مننگ کپک، اوغان الس ءِ تینٹ تولوئی مرسا ویل انا ایسری اس کشوئی مریک۔ او اقوام متحدہ نا جنرل اسمبلی نا 72می دیوان آن پد میڈیا تون ہیت وگپ کریکہ۔ وزیر خارجہ خواجہ آصف و اقوام متحدہ ٹی پاکستان نا آخبتی مندوب ڈاکٹر ملیحہ لودھی ہم داوخت آ ساڑی ئسر۔ وزیراعظم شاہد خاقان عباسی پارے کہ ہرجاگہ پاکستان ناموقفءِ گچین وڑاٹ پیش کریٹ۔
پاکستان نا موقف ءِ بھاز گچین وڑاٹ پیش کرینٹ، ڈیہہ نا حالیت آتا بابت درست موقف ءِ پیش کرینٹ۔ اوپارے کہ کشمیر نا معا ملہ غا تینا موقف ءِ پبی وڑاٹ پیش کریٹ۔ اقوام متحدہ نا سیکرٹری جنرل ءِ کشمیری تیا بیدادی نا ڈوز یئر پیش کریٹ، اقوام متحدہ نا سیکرٹری جنرل تون اوڑدہی و جنرل اسمبلی آن تران اٹی کشمیر نا ویل ءِ پبی وڑاٹ چست کریٹ، اوپارے کہ امریکی صدر تون سوارہ غا غیر رسمی اوڑدہی مس ، چندی ملک آتا سروک آتون اوڑدہی مس، امریکی صدر ٹرمپ پرتباک وڑاٹ ملا۔
اوپارے کہ صدر ٹرمپ انا تقریر مرغن مننگ نا سوب اوغان صدر تون اوڑدہی مننگ کتو۔ وزیراعظم پارے کہ نن اوغانستان اٹی امن خوانہ، اوغانستان اٹی جنگ انا کمک اٹ امن مننگ کپک ،م اوغان الس ءِ تولسا ویل انا ایسری اس کشوئی مریک، اوغانستان نا بابت امن نا ہر کوشست نا مخ تفی ءِ کینہ۔ اوپارے کہ امریکی انتظامیہ تون چندی کہول آ ہیت وگپ مسنے ، تینا نکتہ نظر ءِ پیش کننگ اٹی سرسہب مسونن ۔ اوپارے کہ دہشت گردی نا برخلاف پاکستان بے پناہ قربانی تسنے، اینو دہشت گردی نا برخلاف بیرہ پاکستان ہی جنگ کننگ ءِ، دہشت گردی نا برخلاف قربانی تا الس اعتراف ءِ کرینے، پاکستان اٹی جمہوریت نا سوگوی ءِ دنیا امنا کرینے۔
