اقوام متحدہ(پاکستان نیوزپوائنٹ22ستمبر2017ء) اقوام متحدہ نا جنرل اسمبلی آن تران کرسا وزیراعظم شاہدخاقان عباسی خواست کرے کہ جہانی ادارہ جموں و کشمیر آ تینا قرارداد آتیا عملدرآمد نا چرجوئی ٹی تینا زمواری تے پورو کے و دا چرجوئی ٹی اقوام متحدہ نا سیکرٹری جنرل کشمیر آ خصوصی نمائندہ اس پن کے ہرا سلامتی کونسل نا متکن آ قرارداد آتیا عملدرآمد کرفے۔
اقوام متحدہ نا سیکرٹری جنرل و انسانی حق انا ہائی کمشنر بھارت نا کوزہ ٹی کشمیر اٹی انسانی حق انا خلاف ورزی تا ڈس ءِ خلنگ و اونا زموار آتے سزا ترفنگ و زہمی تے انصاف و ریلیف فراوان کننگ کن انکوائری کمیشن آ گدریفے۔ اوپارے کہ پاکستان جہانی برادری آ زور شاغک کہ او مقبوضہ کشمیر اٹی پیلٹ گن آتے اٹ کشمیری تیا جلہو و کودک شاری تیا بیدادی و ظلم انا چرجوئی ءِ تورفے۔
ریاستی پالیسی نا وڑاٹ زالبول تون بیدادی نا چرجوئی ءِ بندکرفنگے۔ میڈیا نا بلیک آؤٹ ءِ چٹفنگے۔ مقبوضہ کشمیر اٹی ڈریکونین ہڑدڑی کانود ءِ چٹفنگے و غٹ کشمیری سیاسی سروک آتے رہاکننگے۔ وزیراعظم پارے کہ بھارت مقبوضہ کشمیر اٹی تینا بیدادی آن دنیا نا چکار ءِ اسہ کنڈ کننگ کن کشمیر اٹی لین آف کنٹرول آ فائر بندی نا پدریسہ خلاف ورزی کننگ ءِ۔
اوپارے کہ ہندا سال جنوری آن داوخت اسکان بھارت فائر بندی نا 600 خلاف ورزی کرینے۔ پاکستان داحالیت آتیا سگ انا درشانی ءِ کرینے۔ ولے اگہ کنٹرول لین آ بھارت ہراوڑنا کہ مہم جوئی نا ارتکاب ءِ کیک یا پاکستان نا برخلاف جنگ انا ڈاکٹرین آ عمل کیک تو اودے سوگو و بریبر ورندی تننگک۔ اوپارے کہ بھارت پاکستان تون امن عمل ءِ بحال کننگ آ تیار اف۔ نن سلامتی کونسل آ زور شاغنہ کہ او جموں و کشمیر آ تینا قرارداد آتیا عملدرآمد نا چرجوئی ٹی تینا زمواری تے پورو کے۔ دا چرجوئی ٹی اقوام متحدہ نا سیکرٹری جنرل کشمیر آ خصوصی نمائندہ اس پن کے ہرا سلامتی کونسل نا متکن آ قرارداد آتیا عملدرآمد کرفے۔
