اقوام متحدہ(پاکستان نیوزپوائنٹ22ستمبر2017ء) اقوام متحدہ نا جنرل اسمبلی آن تران کرسا وزیراعظم شاہد خاقان عباسی پارینے کہ پاکستان اوغانستان نا جنگ ءِ تینا گل زمین آ مننگ کن اِلیپک ۔ اوپارے کہ نن دُن ءُ بے سہب حکمت عملی اسے پک کننگ کپنہ ہرا پاکستان و اوغانستان و ایلو علاقائی ملک آتا الس نا تکلیف آتیٹی ودکی و اوفتے زیات کے۔ اوپارے کہ اوغانستان اٹی فوجی یا سیاسی تعطل کن مورد دوبہ ٹھہرائفنگ خاص کر پاکستان کن گڑتی نا سوب ءِ۔
اوپارے کہ پاکستان دہشت گردی نا برخلاف جنگ اٹی بھاز زیات مالی و جانی نسخان ہرفینے۔ اوپارے کہ نن کس اسے کن تینے ندر کننگ کن تیار افن،طالبان نا رکھوک ہند جاٹ آک پاکستان اٹی آخا بلکن اوغانستان اٹی طالبان نا کوزہ بھلو علاقہ اسے ٹی ءِ ۔ اوپارے کہ سیم پار آن جلہو ضرور مریک ولے دا جلہو زیات تر سیم انا داپار ساڑی رکھوک ہند جاٹ آتیان پاکستان مخالف دہشت گرد آتا کنڈآن کننگک۔
داوڑنا جلہو آتا توننگ کن پاکستان اوغان حکومت وسیوتی فورس آتے پارینے کہ او سیم ءِ کنٹرول کننگ نا نظام ءِ سوگو جوڑ کننگ و ہن و بر نا چاروکی کن پاکستان نا جاری کوشست آتا مخ تفی ءِ کے۔ اوپارے کہ گدرینگوک آ چار دہائی آن درملکی نیام تمنگ آن ہڑتوم آ ملک آتا الس ءِ بھاز نسخان رسینگا۔ اوپارے کہ پاکستان آن زیات اوغانستان اٹی امن نا پین کس اس داخہ خواہش مند اف ولے اوغانستان اٹی 16سالہ جنگ آن پد داہیت صفا ءِ کہ اوغانستان اٹی امن ءِ جنگ جاری تخسا بحال کننگ مفک ۔
اسہ فریق اس ہم اسہ ایلو آ فوجی ایسری ءِ لاگو کننگ کپک۔ اوپارے کہ پاکستان داہیت آ باور کیک کہ اوغانستان اٹی دمدستی و حق آ مبنی مسخت آتیٹی اوغانستان اٹی داعش، القاعدہ و اونا مخ تف آتا چٹفنگ کن ہم ٹھوس گام گیج آک بایدے اوار مریر۔ وزیراعظم پارے کہ دہشت گردی نا سوب آتیٹی ناانصافی ، جبرو درملکی نیام تمنگ تون اوار سیاسی و ایلو محرومی تیا بے کچ ردعمل ہم ارے۔ اوپارے کہ دا سوب آتے چٹفنگ آن بیدس دہشت گرد رڑ تا بیانیہ تون مون تننگ مشکل ءِ۔
