میانمار نا حکومت روہنگیا نا مسلمان تا برخلاف فوجی کارروائی تے دمدستی وڑاٹ بند کے،سیکرٹری جنرل اقوام متحدہ

اقوام متحدہ (پاکستان نیوزپوائنٹ20ستمبر2017ء) اقوام متحدہ نا سیکرٹری جنرل انٹونیو گوٹرش میانمار آ زور شاغانے کہ او روہنگیا نا مسلمان تا برخلاف فوجی کارروائی تے دمدستی وڑاٹ بند کے۔ اقوام متحدہ نا جنرل اسمبلی نا 72می دیوان آن سے شنبے نادے تران کرسا سیکرٹری جنرل انتو نیو گوٹرش پارینے کہ اقوام متحدہ نا مسکوہی سیکرٹری جنرل کوفی عنان نا رپورٹ اٹی ہرا سلاہ ءِ پیش کننگاسس اوٹی روہنگیا نا مسلمان تے شہریت تننگ نا گرج آ زور شاغنگاسس ولے کنے دا صفا وڑاٹ پاروئی ءِ کہ میانمار نا کمامدارآتے دمدستی وڑاٹ اوفتا برخلاف فوجی آپریشن ءِ بند کروئی مرے و بے اڑاند ہموڑے انسانی ہمدردی نا بنداو آ امداد گدریفنگ نا موکل تروئی مرے۔

اوپارے کہ روہنگیا نا مسلمان تا برخلاف میانمار نا حکومت نا کارروائی تیا ننے کل ءِ بھاز گڑتی ءِ۔ اقوام متحدہ نا سیکرٹری جنرل نا بیان میانمار نا راہشون آنگ سان سوچی نا قوم آن تران آن پد مون آ بسنے۔ آنگ سان سوچی نا تران اٹی جہانی برادری نا دا گڑتی ءِ مر کتو ہرا روہنگیا نا مسلمان تا نسل کشی نا بابت ساڑی ءِ۔ یات سلے کہ میانمار نا دیکی ریاست رخائن اٹی مسلمان تا بھلو کچ اسے آ نسل کشی کننگ انگ ءِ۔ اوفتیا ظلم وبیدادی کننگ انگ ءِ۔ زالبول، چناونرینہ غاتیا جلہو معمول جوڑ مسنے ہرانا سوب داوخت اسکان 4 لکھ 17 ہزار آن زیات مسلمانک اُراتے ہلسا ہمسایہ ملک آتیا ہمپنگ آ بیوس مسنو۔