وزیراعظم شاہدخاقان عباسی نا نائب امریکی صدر مائیک پنس اتون اوڑدہی پاکستان ڈیہہ آن دہشت گردی نا چٹفنگ کن پرعزم ءِ ، دہشت گردی نا برخلاف کمکاری ءِ برجاتخنہ، پاکستان دہشت گردی نا برخلاف جنگ اٹی بے پناہ نسخان ہرفینے، دہشت گردی نا برخلاف جنگ اٹی پاکستان جہانی سیوت نا بشخ اسے، وزیراعظم

نیویارک۔ (پاکستان نیوزپوائنٹ20ستمبر2017ء) وزیراعظم شاہد خاقان عباسی نائب امریکی صدر مائیک پنس اتون سے شنبے ناد ے اوڑدہی کرے ہراٹی تین پہ تینی است خواہی نا معاملہ غاتیا خیال آتا درشانی ءِ کننگا۔ ذرائع ابلاغ نا رداٹ داوخت آ وزیراعظم شاہد خاقان عباسی پارے کہ پاکستان ڈیہہ آن دہشت گردی نا چٹفنگ کن پرعزم ءِ، دہشت گردی نا برخلاف کمکاری ءِ برجاتخنہ۔

پاکستان دہشت گردی نا برخلاف جنگ اٹی بے پناہ نسخان ہرفینے۔ دہشت گردی نا برخلاف جنگ اٹی پاکستان جہانی سیوت نا بشخ اسے۔ اوپارے کہ امریکہ آن دہشت گردی نا برخلاف جنگ و ایلو معاملہ غاتیا خیال آتا درشانی ءِ خواہک۔ داوخت آ امریکی نائب صدر مائیک پنس وزیراعظم شاہد خاقان عباسی نا بننگ آ منت واری ءِ ہرفے و پارے کہ امریکہ پاکستان تون تعلقداری تے بھاز اہمیت ایتک ، ڈیہہ ٹی امن و سلامتی کن پاکستان تون اواری اٹ کاریم کننگ خواہک۔

امریکہ پاکستان آن مریس وختی شریداری خواہک۔ پاکستان تون گچین تعلقداری کن پوسکن ءُ کسر پٹنگ ءِ۔ وزیراعظم شاہد خاقان عباسی نا نائب امریکی صدر مائیک پنس اتون اوڑدہی نا وخت آ وزیر خارجہ خواجہ محمد آصف ، سیکرٹری خارجہ تہمینہ جنجوعہ، اقوام متحدہ ٹی پاکستان نا آخبتی مندوب ڈاکٹر ملیحہ لودھی ، امریکہ ٹی پاکستان نا سفیر اعزاز چوہدری و فواد حسن فواد ئسک ہم ساڑی ئسر۔ امریکی ڈل اٹی سویلی ایشیاکن امریکی نائب وزیر خارجہ ایلس ویلز وائٹ ہاؤس اٹی قومی سلامتی نا ڈائریکٹر پاکستان و اوغانستان ہم اوار ئسر۔