وزیراعظم شاہد خاقان عباسی نا جہانی راہشون آتون فائدہ مند اوڑدہی مسنے، امریکی نائب صدر تون وزیراعظم نا اوڑدہی ٹی اوغانستان نا بابت پاکستان و امریکہ ہیت وگپ ءِ جاری تخنگ آ اتفاق کرینوسیکرٹری خارجہ تہمینہ جنجوعہ و اقوام متحدہ ٹی پاکستان نا آخبتی مندوب ڈاکٹر ملیحہ لودھی نا پریس کانفرنس

نیویارک (پاکستان نیوزپوائنٹ20ستمبر2017ء) سیکرٹری خارجہ تہمینہ جنجوعہ و اقوام متحدہ ٹی پاکستان نا آخبتی مندوب ڈاکٹر ملیحہ لودھی سے شنبے نادے وزیراعظم شاہد خاقان عباسی نا امریکہ ٹی اہم راہشون آتون اوڑدہی و ایلو اختہ ہی تا بابت پریس کانفرنس آن تران کرسا پارے کہ وزیراعظم نا جہانی راہشون آتون فائدہ مند اوڑدہی مسنے۔ سیکرٹری خارجہ تہمینہ جنجوعہ داوخت آپارے کہ امریکی نائب صدر مائیک پنس تون وزیراعظم شاہد خاقان عباسی نا اوڑدہی اہم مس ۔

اوغانستان نا بابت پاکستان و امریکہ ہیت وگپ ءِ برجاتخنہ۔ داوخت آ وزیراعظم امریکی نائب صدر ءِ قومی سلامتی کمیٹی نا فیصلہ غاتیان معلومدار کرے، پاکستان و امریکہ نا نیام اٹ معاملہ غاتے ہیت وگپ اٹ ایسر کننگ آ اتفاق مس ۔ امریکی ڈل اکتوبر اٹی مذاکرات کن پاکستان آ بریک۔ سیکرٹری خارجہ پارے کہ وزیراعظم شاہد خاقان عباسی نا ترک صدر رجب طیب اردوان تون اوڑدہی ٹی تین پہ تینی تعلقداری تا مون آ دننگ آ ہیت وگپ مس۔

ترکی اوغان حکمت عملی نا بابت پاکستان نا موقف نا تائید ءِ کرینے۔ ترک صدر روہنگیا نا مسلمان تا بابت معاملہ غاتیا ہم خیال آتا درشانی ءِ کرے۔ ترکی بنگلہ دیش اٹی روہنگیا مسلمان تا امداد ءِ کننگ خواہک۔ سیکرٹری خارجہ پارے کہ سری لنکا نا صدر تون وزیراعظم شاہد خاقان عباسی نا اوڑدہی ٹی سارک اتون اوار چندی معاملہ غاتیا ہیت وگپ مس۔ شاہ عبداللہ تون اوڑدہی ٹی وزیراعظم اردن نا باہوٹ آتے کن گام گیج آتا ستاءِ کرے۔

سیکرٹری خارجہ پارے کہ وزیراعظم شاہد خاقان عباسی و ایران نا صدر محمد حسن روحانی نا اوڑدہی بھاز اہمیت نا حامل ئس۔ کشمیری تا حق خودارادیت نا بابت ایران نا صدر نا بیان خوش آئند ءِ۔ اوڑدہی ٹی پاکستان و ایران نا نیام اٹ تین پہ تینی رابطہ غاتا بابت معاملہ غاتیا خیال آتا درشانی مس۔ اقوام متحدہ ٹی پاکستان نا آخبتی مندوب ڈاکٹر ملیحہ لودھی میڈیا نا نمائندہ غاتے پارے کہ او آئی سی دیوان اٹی روہنگیا مسلمان آتون چندی معاملہ غاتیا شرہ مس۔

روہنگیا مسلمان تا بابت اقوام متحدہ نا سیکرٹری جنرل نا موقف نا تائید ءِ کینہ۔ بنگلہ دیش روہنگیا نا باہوٹ آتے کن جہانی امداد نا خواست کرینے۔ ڈاکٹر ملیحہ لودھی پارینے کہ وزیراعظم شاہد خاقان عباسی تون اوڑدہی ٹی ایرانی صدر پارے کہ علاقائی معاملہ غاتیٹی پاکستان ءِ اسہ اہم ءُ ہند اس دوئی ءِ۔ ڈاکٹرملیحہ لودھی پارے کہ سری لنکا نا صدر نا وزیراعظم شاہد خاقان عباسی تون اوڑدہی ٹی کرکٹ نا معاملہ غاتیا ہم خیال آتا درشانی مس۔