اقوام متحدہ (پاکستان نیوزپوائنٹ20ستمبر2017ء) وزیراعظم شاہد خاقان عباسی اقوام متحدہ نا جنرل اسمبلی نا دیوان نا وخت آ ایران نا صدر محمد حسن روحانی تون سے شنبے نا دے نیویارک اٹی اہم اوڑدہی کریر۔ ہڑتوم آ راہشونک تین پہ تینی تعلقداری تے پین سوگو جوڑ کننگ آن بیدس علاقائی امن و سوگوی آ ہم ہیت وگپ کریر۔ وزیراعظم پرامن ہمسائیگی نا پالیسی نا اعادہ ءِ کرسا داوخت آ پارے کہ پاکستان ایران تون تینا تعلقداری تا سوگوی کن پرعزم ءِ۔
اوپارے کہ ایران و پاکستان نا تعلقداریک اسہ تاریخ، دودوربیدہ و الس آ ن الس نا تعلقداری تیا ٹی ءُ۔ اوپارے کہ ہڑتوم آ ملک آتا نیام اٹ بڑزکو کہول آ رابطہ غاتیٹی ودکی آن چندی بشخ آتیٹی تین پہ تینی مفاد آتیا مبنی تعلقداری تے پین سوگو کننگ اٹی کمک ملک۔ ایرانی صدر محمد حسن روحانی پاکستان تون تعلقداری تے پین سوگو کننگ نا عزم انا درشانی ءِ کرسا پارے کہ ہڑتوم آ ملک آتے بارڈر مینجمنٹ ، واپار و زرکاری نا بشخ آتیٹی پین پیش رفت کن اواری اٹ بایدے کاریم کروئی مرے۔
وزیراعظم شاہد خاقان عباسی مقبوضہ جموں و کشمیر نا الس نا حق خودارادیت نا دوئی کن روا و مبنی برحق جہد آ ایران نا پدریسہ کمک آ منت واری ءِ ادا کرے۔ ہڑتوم آ راہشونک اوغانستان اٹی امن و سوگوی کن کوشست آتیا ہم خیال آتا درشانی ءِ کریر و اتفاق کریر کہ اوغانستان نا جھیڑہ نا ہچ ءُ فوجی ایسری اس اف۔ اوغانستان اٹی آخبتی امن کن مذاکرات نا کمک اٹ ویل انا سیاسی ایسری اس کشنگ مریک۔
ہڑتوم آ راہشونک داہیت آ ہم اتفاق کریر کہ اوغانستان اٹی ودوک آ نزوری نا سوب آن پڑوسی ملک آتیا دانا بھاز زئم تمانے، ہنداخاطران اوغان جھیڑہ نا ایسری کن علاقائی اپروچ اختیار کننگ نا گرج ءِ۔ وزیراعظم شاہد خاقان عباسی و ایرانی صدر حسن روحانی روہنگیا نا مسلمان تیا شدید بیدادی تیا ہم بھاز گڑتی نا درشانی ءِ کرے و جہانی برادری آن خواست کرے کہ او روہنگیا نا مسلمان تا حالیت آ دمدستی گام گیج کے۔
