اقوام متحدہ (پاکستان نیوزپوائنٹ20ستمبر2017ء) پاکستان میانمار اٹی روہنگیا مسلمان تا حالیت آ گڑتی نا درشانی ءِ کرسا اسلامی ملک آتا تنظیم (او آئی سی ) آن خواست کرینے کہ او روہنگیا نا مسلمان ایڑ و ایلم تا ضمیر نا اسیجا توار جوڑ مننگ اٹی تینا کلیدی کڑد ءِ ادا کے۔ اقوام متحدہ نا ہیڈ کوارٹر اٹی سے شنبے نادے 57 ملک آتا تنظیم او آئی سی نا رابطہ رڑ انا دیوان آن تران کرسا وزیراعظم شاہد خاقان عباسی او آئی سی ءِ باوری ترفے کہ پاکستان دا نیک انگا مسخت کن تینا پبی مخ تفی ءِ کیک۔
اوپارے کہ او آئی سی یا اقوام متحدہ نا کنڈآن انسانی ہمدردی نا بنداو آ روہنگیا نا مسلمان تا ہروڑنا کوشست نا پبی مخ تفی ءِ کیک۔ وزیراعظم پارے کہ ہزار آ بے گناہ ، نیاڑی و نرینہ و چناک میانمار اٹی تینا نہادی جان تیان دوتے سلانو وخت اس کہ ساڑی آ واقعہ غاک روہنگیا نا مسلمان تا نسل کشی نا زندہ ءُ مثال اسے۔ اوپارے کہ داوخت اسکان 4لکھ آن زیات روہنگیا نا مسلمان تے تینا اُراتے ہلنگ آ بیوس کننگانے۔
دابے گناہ خلقت ہمسایہ ملک آتیٹی جاگہ پٹنگ اٹی ءُ ۔ اوپارے کہ روہنگیا نا مسلمان تا دامنظم نسل کشی و امتیازی سلوک داسہ بایدے چٹے۔ اوجہانی برادری آ زور شاغا کہ او روہنگیا نا مسلمان تیا ظلم و بیداد و اوفتا نسل کشی ءِ توننگ کن میانمار نا حکومت آ ہروڑنا زور شاغے۔ پاکستان میانمار نا حکومت آن ہم خواست کرے کہ او حالیت آتیٹی بے چیٹی تے کم کننگ کن دمدستی گام گیج کے و روہنگیا نا مسلمان آبادی نا رکھ ءِ المی جوڑ کے۔
وزیراعظم پارے کہ روہنگیا نا حکومت جہانی کانود نا پاسداری ءِ کے و روہنگیا نا مسلمان تا برخلاف ہروڑنا بیداد ی نا کارروائی تے بند کے۔ پاکستان اقوام متحدہ آن ہم خواست کرے کہ او دمدستی وڑاٹ روہنگیا نا مسلمان تا حالیت نا جاچ ءِ ہلنگ کن اقوام متحدہ نا فیکٹ فائنڈنگ مشن اس گدریفے و انسانی ہمدردی نا بنداو آ امداد گدریفنگ نا بست و بند ءِ کے۔ وزیراعظم پارے کہ میانمار نا حکومت روہنگیا نا غٹ باہوٹ آتا رکھ پدی ہِننگ ءِ المی جوڑ کننگ کن سازگار حالیت ودی کے و اوفتا روا حق ءِ ایتے ہراٹی اوفتا شہریت ، مذہبی آجوئی و میانمار نا بریبر نا شاری نا حیثیت اٹ اوفتا آجو ہن و بر اوار ءِ۔
