بیجنگ/اسلام آباد(پاکستان نیوزپوائنٹ 15جون2017ء) شنگھائی کمکار تنظیم نا ہیڈ کوارٹرز آ تنظیم نا پوسکن آ باسک ملک آک پاکستان و بھارت نا قومی بیرک آتے چست کریر،داوخت آ تنظیم نا سیکرٹری جنرل رشید علیموف ، چین اٹی پاکستان نا سفیر خالد مسعود ، چین اٹی بھارت نا سفیر وجے گوکھالے، تنظیم نا مبصر ملک آتا سفیر، چینی وزارت خارجہ نا نمائندہ و ایلو سینئر سفارتی کمامدارآک ہم ساڑی ئسر۔
تینا خیر مقدمی تران اٹی تنظیم نا سیکرٹری جنرل پارے کہ اینو آن 16سال مست سیاسی نقشہ غا شنگھائی کمکار تنظیم نا ظہور مس۔ پرامن ہمسائیگی ، سیوت و شونداری نا ہدف تنظیم نا باسک ملک آتا نیام اٹ تعلقداری تا بنداو ءِ و داغرض و مسخت آتا بنداو آ بین الاقوامیت نا طرز حیات اٹی دا تنظیم ءِ اسہ جتا ءُ ہند اس دوئی ءِ۔ اوپارے کہ ساڑی ہی ٹی قزاخستان نا دارالحکومت آستانہ ٹی اڈ ہلوک آ سروکی دیوان اٹی پاکستان و بھارت ءِ تنظیم نا پورو باسک جوڑ مننگ نا تاریخی فیصلہ اس کننگا۔
اینو شنگھائی کمکار تنظیم نا دے انا وخت آ نن داڑے جمع مسونن تانکہ نن تینا پوسکن آ باسک ملک آتا بیرک آتے چست کننگ کینہ۔ اوپارے کہ اینو آن پد ایس سی او نا بیرک آن بیدس 8 باسک ملک آتا بیرک اسہ جاگہ غا چست کننگک۔ اوپارے کہ ایس سی او ءِ تینا سرسہبی تیا فخر ءِ ولے اینو نا عالم گیر دنیا ٹی ہچ ءُ ملک یا تنظیم اس ویل آتے ایسر کننگ کپک ، ہراتم ہم دنیا ءِ خلیس و چیلنج آتا مون مریک شنگھائی کمکار تنظیم برائی نا واک آتا برخلاف و امن، شونہالی و شونداری و سوگوی نا واک آتون سلک۔
اوپارے کہ اقوام متحدہ نا چارٹر نا تہٹی سلسا کاریم کننگ ءِ۔ داوخت آ چین اٹی پاکستان نا سفیر مسعود خالد پارے کہ اینو بیرک آتے چست کننگ نا دا دود پاکستان کن اسہ پوسکن ءُ سفر اسے نا بناءِ۔ داسرسہبی و خوشی نا وخت آک ءُ و نن آخبت اٹی دادے ءِ خصوصی وڑاٹ یات تخنہ۔ ہراتم نن شونداری ، امن، شونہالی و سوگوی کن ایس سی او نا سنگت ملک آتون سفر نا بناءِ کرین۔ اوپارے کہ تنظیم نا باسک ملک آتا نیام اٹ تاریخی، دودوربیدہ ہی و اقتصادی رشتہ ساڑی ءِ۔ پاکستانی سفیر آستانہ سروک دیوان کن شاندار بست و بند کننگ آ قزاخستان نا حکومت و الس نا منت واری ءِ ہم ادا کرے۔ داوخت آ بھارتی سفیر ہم تران کرے۔ داوخت آ پاکستان و بھارت نا قومی ترانہ ءِ ہم خلنگا۔
