واشنگٹن(پاکستان نیوزپوائنٹ 14جون2017ء) امریکہ ناچندی ریاست آتیٹی گدرینگوک آ 24گھنٹہ ٹی سم کاری نا واقعہ غاتیٹی کم از کم 16بندغ تپاخت و 55ٹھپی مسنو۔ ارنانیوز نا رداٹ امریکہ ٹی سلہہ غاتا کاریم اٹ اتنگ و سم کاری نا واقعہ غاتا اندراج نا بنجاء تینا رپورٹ اٹی پارینے کہ سم کاری نا گیشتر واقعہ ریاست مشی گن ، میری لینڈ و کنٹکی ٹی پیش بسنے۔ رپورٹ نا رداٹ گدرینگوک آ 48گھنٹہ ٹی امریکہ نا چندی علاقہ غاتیٹی سلہہ غاتا کاریم اٹ اتنگ و سم کاری نا 201واقعہ درج کننگا ہرافتے ٹی 55بندغ تپاخت و 184پین ٹھپی مسر۔
یات سلے کہ امریکہ نا چندی علاقہ غاتیٹی سم کاری نا واقعہ غاتیٹی ہرسال ہزار آ بندغ تپاخت و ٹھپی مریرہ۔ وخت اس کہ دا ملک اٹی سلہہ غاتا کنٹرول نا چرجوئی ٹی داوخت اسکان ہچ ءُ کانود اس ہم جوڑ کننگ تنے۔
