ہانگ کانگ(پاکستان نیوزپوائنٹ 17مئ2017ء) وزیراعظم محمد نواز شریف تون ہانگ کانگ نا بھلا کمپنی تا سروک آک چارشنبے نا دے داڑے اوڑدہی کریر وپاکستان اٹی زرکاری ٹی است خواہی نا درشانی ءِ کریر۔ وزیراعظم تون زیڈ ٹی ای کارپوریشن نا چیئرمین یو یائی من، شانڈونگ ہائی سپیڈ گروپ نا چیئرمین سن لیانگ و بیجنگ انٹر پرائیزز ہولڈنگ لمیٹڈ نا چیئرمین وانگ ڈونگ جتا جتا اوڑدہی کریر۔
دا اوڑدہی تیٹی پاکستان و ہانگ کانگ نا پبلک پرائیویٹ سیکٹر اٹی برنس رابطہ غاتے شونداری تننگ آ خیال آتا درشا نی ءِ کننگا۔ وزیراعظم ہندا سروک آتے پاکستان اٹی زرکار دوست پالیسی تیان معلومدار کرے ہرافتا کمک اٹ درملکی زرکارآتے آسراتی و آسودہی تننگک۔ ہانگ کانگ نا کمپنی تا سروک آک اوڑدہی نا وخت تننگ آ وزیراعظم پاکستان نا منت واری ءِ ادا کریر وپاریر کہ او پاکستان اٹی بزنس و واپار نا وارخواہی تا پٹنگ آ کاریم کیرہ۔
یات سلے کہ زیڈ ٹی ای کارپوریشن ٹیلی کمیو نیکیشن نا ازباب و نیٹ ورک نا خذمت فراوان کیک و دانا بزنس دنیا نا 140ملک آتیٹی تالان ءِ۔ شانڈونگ ہائی سپیڈ گروپ ٹرانسپورٹ نا صنعت ءِ شونداری تروک آ سرکاری کمپنیءِ وبیجنگ انٹرپرائزز کمپنی بنداوی وڑاٹ شارتیٹی گیس، واٹر ٹریٹمنٹ و یسٹ مینجمنٹ نا بشخ آتیٹی کاریم کیک۔
