ہانگ کانگ(پاکستان نیوزپوائنٹ 17مئ2017ء) وزیراعظم محمد نواز شریف پارینے کہ پاکستان مچ آ دنیا تون تینا کاروباری و واپاری تعلقداری تا مون آ دننگ نا خواہش مند ءِ ، ننا اسٹاک مارکیٹ دنیا نا ترندی اٹ شون ہلوک آ بھلا مارکیٹ جوڑ مسنے ، جہانی ریٹنگ ایجنسیک پاکستان نا اقتصادی شونداری ءِ پک کرینو، سی پیک نا رداٹ زیر تکمیل 9 خصوصی اقتصادی زون تیٹی زرکاری نا بھلو وارخواہی اس ساڑی ارے، انفارمیشن ٹیکنالوجی و سیل و سوات نا بشخ آتے صنعت نا درجہ تسنے، پاکستان نا شمار دنیا نا ترندی اٹ شون ہلوک آ معیشت آتیٹی مریک، ملکی معیشت نا اصلاحات کن جامع گام گیج کننگانے پائیدار اقتصادی شونداری نا سوب پاکستان نا شمار دنیا نا 25بھلا معیشت آتیٹی مریک۔
وژن 2025ء نا رداٹ پائیدار شونداری نا دوئی نا ہدف آتے کن جامع حکمت عملی اس جوڑ کننگانے۔ داخیال آتا درشانی ءِ وزیراعظم محمد نواز شریف ہانگ کانگ اٹی پاکستان زرکاری کانفرنس آن تران کرسا کرے۔ اوپارے کہ ہانگ کانگ دنیا نا معیشت اٹی اہم کڑد ادا کننگ ءِ ۔ پاکستان ہانگ کانگ نا معاشی شونداری آن زہمی ءِ۔ پاکستان ترندی اٹ شون ہلوک آ معاشی واک جوڑ مسنے و زرکاری نا پوسکن ءُ وارخواہی ودی مننگ ءِ۔
سال 2013ء آن مست پاکستان نا جم اٹنگا قومی پیداوار (جی ڈی پی) نا سالانہ شرح نمو 3 درسد اوسطاََ ئس ہرا ودسا 5درسد مسنے و بروک آ اِراسال اٹی سالانہ شرح نمو 7 درسد اسکان رسینگک۔ وزیراعظم پارے کہ پاکستان پائیدار اقتصادی شونداری، گڈگورننس و معاشی نظم و ضبط نا رداٹ شرح نمو ٹی ودکی مسنے۔ توانائی و بنداوی ڈھانچہ تون اوار ایلو چندی بشخ آتیٹی زرکاری نا بھلو گمان اس ساڑی ارے۔
اوپارے کہ حکومت راجی رکھ انا بابت جامع گام گیج کننگ ءِ۔ داکان بیدس حکومت براہ راست درملکی زرکاری نا مون آ دننگ‘ میکرواکنامک سوگوی‘ بجٹ نسخان ءِ کم کننگ و توانائی نا بشخ ءِ تروک آ سبسڈی ٹی کمتی کن ہم گام گیج کننگ ءِ۔ وزیراعظم پارے کہ پاکستان اسٹاک ایکسچینج 4سال آن کم وخت اٹی نمان شونداری کرینے ہرا ملک اٹی مالی و اقتصادی سوگوی نا نشانی ءِ۔
وزیراعظم محمدنواز شریف پارے کہ جہانی بینک اینخو مالی سال اٹی جی ڈی پی ٹی 5.2درسد نا شرح نمو نا پیش کش کرینے وخت اس کہ سٹینڈ رڈ اینڈ پورز اٹی تینا اسہ رپورٹ اسے ٹی پارینے کہ 2018 ء اسکان ملک اٹی نیزگاری نا کچ اٹی نمان کمتی واقع مریک۔ داکان بیدس کیہی جہانی ریٹنگ ایجنسیک ہم پاکستان نا اقتصادی شونداری ءِ پک کرینو۔ او پارے کہ ننا حکومت بیرہ اقتصادی شونداری آ چکار تخپننگ ءِ بلکن پائیدار اقتصادی شونداری کن کاریم کننگ ءِ تانکہ معاشی شونداری نا بھرم آتیان زیات آن زیات فائدہ ہرفنگ مرے۔
اوپارے کہ حکومت تعلیم و راجی رکھ انا بشخ انا شونداری آ ہم چکار تخنگ ءِ۔ وزیراعظم پارے کہ پاکستان نا حکومت اسیجائی وژن نا نظریہ غا یخین تخک۔ اوپارے کہ پاکستان نا حکومت پائیدار اقتصادی شونداری نا دوئی کن وژن 2025ء نا رداٹ جامع حکمت عملی اس مرتب کرینے۔ داکان بیدس کنز یومرفنانسنگ ، خذمات ، انفارمیشن ٹیکنالوجی و ریٹیل پین پین تون اوار ایلو بشخ آتا شونداری آ ہم خصوصی چکار تخنگ ءِ۔
اوپارے کہ دا بشخ آتیٹی زرکاری نا بھلو گمان اس ساڑی ارے وزیراعظم محمد نواز شریف پارے کہ پاکستان اٹی متوسط تپہ نا کچ اٹی نمان ودکی مسنے۔ ہرانا سوب ملک اٹی کاریم کروک آ جہانی کمپنی تا کچ ودانے۔ اوپارے کہ حکومت جامع اقتصادی حکمت عملی نا رداٹ براہ راست درملکی زرکاری ءِ زیات آن زیات متوجہ کننگ کن ڈٹ آتیا نظرثانی کرینے۔ اوپارے کہ حکومت پاکستان اٹی کاروباری وارخواہی ودفنگ نا بابت مخصوص اقتصادی زون تا اڈتننگ آ خصوصی چکار تخنگ ءِ وپاکستان اٹی کروک آ براہ راست درملکی زرکاری ءِ آئینی رکھ دوئی ءِ۔
اوپارے کہ گدرینگوک آ دے پاکستان ای کامرس نا بشخ اٹی شونداری نا بابت چین اتون قول و اقرار کرینے۔ توانائی نا بشخ اٹی زرکاری نا گمان تا بارواٹی اوپارے کہ حکومت بشخ اٹی زرکاری کروک آ زرکار آتے کن پرکشش آسراتی نا پیش کش کیک۔ اوپارے کہ پاکستان اٹی چندی ذریعہ غاتیان بجلی ودی کننگ نا بھلو وارخواہی اس ساڑی ارے و توانائی نا پیداوار اٹی ودکی کن چندی ذریعہ غاتیان بجلی کننگ نا چندی ڈٹ آتیا ترندی اٹ کاریم برجاءِ۔
ٹیلی کمیونیکیشن نا صنعت نا بابت وزیراعظم پارے کہ داٹی شونداری نا بھلو گمان اس ساڑی ءِ و حکومت نا لبرل زرکارپالیسی آن زرکاری نا وارخواہی ساڑی ءِ۔ داکان بیدس مینو فیکچرنگ و آٹو انڈسٹری نا بشخ انا بابت پاکستان بھلا واپاری بنجا جوڑ مننگ کیک۔ اوپارے کہ آٹو سیکٹر اٹی کاریم کروک آ ہندی کمپنیک تینا صارف آتے کن جہانی معیار نا رداٹ مصنوعات تیار کننگ ءِ۔
وزیراعظم محمد نواز شریف پارے کہ پاکستان پال ودی کروک آ دنیا نا چارمیکو بھلا ملک ءِ وخت اس کہ لائیو اسٹاک نا بشخ انا بابت پاکستان دنیا نا مسٹ میکو بھلا ملک ءِ اوپارے کہ ملک اٹی پال و سُو انا ہندی گرج آتیٹی دے پہ دے ودکی مننگ ءِ۔ داکان بیدس ایئر لائن ، بینکنگ ، سیل و سوات و کشت وکشار تون اوار ایلو چندی بشخ آتیٹی 100 درملکی زرکاری و کٹیا نا ہم 100 درسد منتقلی ناہم موکل ءِ۔
وخت اس کہ چندی بشک آتیٹی خام مال، مشینری و پلانٹ وغیرہ نا ہم ڈیوٹی فری برآمد نا موکل ءِ۔ اوپارے کہ ملک توانائی و ٹرانسپورٹ نا بابت دنیا نا واپاری راہداری جوڑ مننگ کیک پاکستان نا جغرافیائی حیثیت ڈیہہ ٹی بنداوی اہمیت نا حامل ءِ اوپارے کہ ون بیلٹ ون روڈ فورم چین نا صدر ژی جن پنگ نا وژن نا عکاسی ءِ کیک ہرانا رداٹ غت ملک آتے کن شونداری نا بریبری وارخواہی دوئی مریک۔
اوپارے کہ ون بیلٹ ون روڈ انا ڈٹ آن نئے بیرہ سویلی ایشیاء بلکن نیامی ایشیاء تون اوار دنیا نا ایلو ملک آتیٹی بنداوی ڈھانچہ ، توانائی ، صنعت و واپار نا شونداری مریک۔ چین پاکستان اقتصادی راہداری ڈٹ انا حوالہ ءِ ترسا وزیراعظم پارے کہ سی پیک ون بیلٹ ون روڈ انا وژن نا بھلا بشخ ءِ ہرا نئے بیرہ ڈیہہ بلکن مچ آ دنیا نا واپاری سرجزآتا مون آ دننگ اٹی کمکار جوڑ مریک۔
ہراڑآن جہانی واپاری رابطہ غاتیٹی ودکی مریک و واپاری گڑاتا ہتنگ و دننگ نا وخت آتیٹی نمان کمتی مریک ہراڑآن وسط ایشیاء یورپ و سویلی ایشیاء نا ملک آتے گنڈنگ مریک۔ اوپارے کہ جہانی معاشی رداٹ راجی رکھ و اقتصادی رابطہ غاتیٹی ودکی آ خصوصی چکار تخنگ انگ ءِ تانکہ پیداوار شونداری نا دوئی ءِ المی جوڑ کننگ مرے۔ وزیراعظم پارے کہ پاکستان و چین راجی و اقتصادی شونداری کن تین پہ تینی کمک کننگ ءُ۔
اوپارے کہ ملک اٹی خلقت نا سیاسی وت واجہی نا مون آ دننگ آ خصوصی چکار تخنگ انگ ءِ ۔ وزیراعظم پارے کہ ساڑی دور اٹی ننے واپاری آسراتی تا ودکی آ چکار تخنگ نا گرج ءِ و چین داڑآ عمل کننگ ءِ۔ اوپارے کہ ننا غٹ انا زمواری ءِ کہ ون بیلٹ ون روڈ (اوبور) ڈٹ انا پوروی ٹی تینا تینا کڑد ءِ ادا کین۔ وزیراعظم محمد نواز شریف پارے کہ پاکستان اٹی سی پیک نا رداٹ چندی علاقہ غاتیٹی 9 خصوصی اقتصادی زون اڈتننگ انگ ءِ ہرافتے ٹی زرکاری نا بھلو وارخواہی اس ساڑی ءِ۔
دا اقتصادی زون تیٹی زرکاری نا پرکشش آسراتی تیان فائدہ ہرفنگ مریک۔ اوپارے کہ پاکستان آبادی نا بابت آن دنیا نا 6می بھلا ملک ءِ ہراڑے ورناانسانی وسیلہ غاتا فراوانی ءِ۔ وزیراعظم پارے کہ پاکستان مچ آ دنیا تون تینا کاروباری و واپاری تعلقداری تا مون آ دننگ نا خواہش مند ءِ۔
