واشنگٹن(پاکستان نیوز پوائنٹ 26اپریل2017ء) پاکستان و امریکہ علاقائی امن وسوگوی ءِ اسیجائی مسخت گوندسا اواری اٹ کاریم کننگ آ اتفاق کرینو۔ دا امنائی داڑے امریکہ نا سلاہکار قومی سلامتی لیفٹیننٹ جنرل میک ماسٹر و وزیر خزانہ اسحاق ڈار نا وائٹ ہاؤس اٹی اوڑدہی ٹی مس۔ وزیر خزانہ لیفٹیننٹ جنرل میک ماسٹر تون وزیراعظم نا خصوصی ایلچی نا حیثیت اٹ اوڑدہی کرے۔
داوخت آ امریکہ ٹی پاکستان نا سفیر اعزاز احمد چوہدری اونا کمک ءِ کرے۔ کڑدہ غاک تین پہ تینی است خواہی نا معاملہ غاتیا رابطہ غاتے جاری تخنگ نا گرج آ زورشاغار۔ وزیر خزانہ وزیراعظم نا اقتصادی اصلاحات نا ایجنڈا نا بارواٹی امریکہ نا سلاہکار قومی سلامتی ءِ معلومدار کرے ہرانا نتیجہ ٹی اقتصادی سوگوی بسنے و جہانی ادارہ غاک ہم اونا ستاءِ کرینو۔
پاکستان نا سیکورٹی نا حالیت آتا بابت وزیر خزانہ پارے کہ تینا گل زمین آن دہشت گردی نا چٹفنگ نا بابت پاکستان نا عزم انا عکاسی آپریشن ضرب عضب نا سرسہب پوروی آن مریک اوکان پد داسہ مچ آ ملک اٹی آپریشن ردالفساد جاری ءِ ، اونا سوب آن پاکستان اٹی دہشت گردی نا واقعہ غاتیٹی نمان کمتی مسنے۔ امریکہ نا سلاہکار قومی سلامتی دہشت گردی نا برخلاف جنگ اٹی پاکستان نا قربانی و انسداد دہشت گردی کن پاکستان نا استعداد ءِ سوگو جوڑ کننگ نا بابت تینا عزم انا ذکر ءِ کرے۔ لیفٹیننٹ جنر ل میک ماسٹر وزیر خزانہ ءِ ڈیہہ نا تینا ساڑی آ دورہ نا بارواٹی پارے۔
