واشنگٹن(پاکستان نیوز پوائنٹ 26اپریل2017ء) وزیر خزانہ اسحاق ڈار پارینے کہ حکومت نا ڈھانچہ جاتی اصلاحات و مالیاتی پالیسی تا سوب آن جم اٹنگا اقتصادی شونداری ٹی ودکی مسنے، پاکستان اولیکو وار سرسہبی اتون آئی ایم ایف نا پروگرام ءِ پورو کرینے، گدرینگوک آ چار سال اٹی معیشت توانائی و تعلیم نا بشخ آتیٹی نمان گچینی بسنے۔ اوداخیال آتا درشانی ءِ داڑے پاکستان ایمبیسی فورم نا پاکستان اٹی اقتصادی اصلاحات و بحالی نا سرحال آ مروک آ مسٹ میکو سیشن آن تران کرسا کرے۔
سیشن اٹی امریکہ نا پنی کمپنی و تھنک ٹینکس نا نمائندہ و امریکہ ٹی رہینگوک پنی پاکستانیک شرکت کریر۔ وزیر خزانہ پارے کہ علاقائی رابطہ غاتا مون آ دننگ و زرکاری ٹی ودکی نا کوشست آتیان پاکستان نا اقتصادی شونداری ءِ المی جوڑ کننگ اٹی کمک ملانے، ننا جم اٹنگا معیشت ءِ مون تروک سنجیدہ چیلنج آتون مون تننگ کن شونداری نا رفتار ءِ پین ترند کننگ نا گرج ءِ۔
اوپارے کہ علاقہ ٹی امن کن کشمیر نا ویل انا ایسری المی ءِ۔ پاکستان امریکہ نا پوسکن آ انتظامیہ تون خڑکی رابطہ غاتا کمک اٹ کاریم کننگ نا خواہندار ءِ تانکہ ہڑتوم آ ملک آتا نیام اٹ ہڑتوم آ کنڈآتا تعلقداری تے سوگو جوڑ کننگ مرے۔ داوخت آ پاکستان نا سفیر اعزاز احمد چوہدری پارے کہ پاکستان سیکورٹی و اقتصادی محاذ آتیا سرسہبی دوئی کننگ ءِ۔ اواومیت ظاہر کرے کہ ساڑی حکومت نا وژن و عزم انا سوب پاکستان چندی راجی و اقتصادی بشخ آتیٹی بڑزکو انگا اقتصادی شرح و پائیدار شونداری نا دوئی نا کسر آ روان ءِ۔
