اوگانستان ءَ گوازوکیں سالءِ تہا لٹء ُ کُٹ ء ُ کُشتء ُ ھونء ُ وئیلانی تہا تاں انوں 1601شہری بیران بوتگ اَنت، اقوا م متحدہ

کابل (پاکستان پوائنٹ نیوز۔25 جولائی۔2016) اوگانستانءَ گوازوکیں سالءِ تہا لٹ ء ُ کُٹء ُ کُشتء ُ ھون ءِ وئیلانی تہا تاں انوں 1601شہری بیران بوتگ اَنت۔ فرانسیسی ھال رسانکی ایجنسی ء َ گشتگ کہ اے گپ اوگانستان ءِ ھاترءَ اقوام متحدہ ءِ مشن ءِ نیمگءَ چہ جاری بوتگیں یک رپورٹے ءِ تہا گشگ بوتگ۔ رپورٹ ءِ تہا گشگ بوتگ کہ بیم ء ُ کار ء ُ ایر جنوکانی کاروائی آں چہ درساں چہ گیش زھگ آماچ بوتگ اَنت۔ رپورٹ ءِ تہا گشگ بوتگ کہ جنوری ء َ بہ گر تاں جون ءَ لٹء ُ کُٹ ء ُ کشتء ُ ھون ءِ کاروائی آنی تہا بیران بوتگیں شہرآنی شرح گوستگیں سال ءِ ھمے وھدء ِ ھسابءَ چار درسد گیش اِنت۔ جنوری تاں جون ءِ وھدءَ لٹء ُکُٹ ء ُ کُشتء ُ ھون ءِ کاروائی آں 3ہزار 500شہری ٹپیگ بوتگ اَنت۔