قاہرہ (پاکستان پوائنٹ نیوز۔25 جولائی۔2016) مصری فوج نا جیٹ جہاز آک جزیرہ نما سیناء نا سویل دیکی ٹی عسکریت پسند آتا برخلاف فضائی جلہو آتیٹی کم آن کم 12عسکریت پسند تپاخت کرینو۔ عرب خبررساں ادارہ نا رداٹ مصری فوج انا کنڈآن جاری کروک اسہ بیان اسے ٹی پاننگانے کہ فورسز آک العریش و ایلو ہند آتیا عسکریت پسند تنظیم ’انصاربیت المقدس‘ نا ٹھکانہ غاتیا بمباری کریر ہرانا نتیجہ ٹی اسہ درزن عسکریت پسند تپاخت و کیہیک ٹھپی مسر۔
ارٹ میکو کنڈ العریش شاراٹی نادرست سلہہ بند بندغ آتا سم کار ی آن ملٹری پولیس نا اسہ افسر اس ہم تپاخت کرے۔ مصری وزارت داخلہ نا کنڈآن جاری کروک بیان اٹی پاننگانے کہ نادرست بندغ آک القسیمہ پولیس نا ڈپٹی انچارج کیپٹن احمد حسن رشاد آ سم کاری کریر ہرانا نتیجہ ٹی اونا مرک واقع مس۔ اناطولیہ نیوز ایجنسی نا رداٹ مصری پولیس افسر ءِ ہمووخت آ سم کاری نا نشانہ جوڑ کننگا ہراتم او معمول نا گشت آ ئسر۔ واقعہ آن گڈ سیکورٹی کمامدارآک علاقہ نا ناکہ بندی ءِ کرسا سرچ آپریشن نا بناءِ کریر واہم ہچ ءُ شکبر بندغ اسینا دزگیری مننگ کتو
