اقوام متحدہ(پاکستان نیوز پوائنٹ 3 نومبر2016ء) پاکستان اقوام متحدہ آن خواست کرینے کہ سویلی ایشیاٹی امن نا اڈ تننگ کن کشمیری تے حق خودارادیت تننگے۔ اقوام متحدہ ٹی پاکستان نا آخبتی مندوب ڈاکٹر ملیحہ لودھی جنرل اسمبلی نا مسٹ میکو کمیٹی نا دیوان اٹی خیال آتا درشانی ءِ کرسا پارے کہ کشمیری تا حق خودارادیت کن جہد ءِ دہشت گردی گوندنگ نا کوشست قابل مذمت ءِ۔
کشمیری تا غیر کانودی کوزہ، آجوئی نا جہد رَوا ءِ و دا جہد کن جہانی برادری نا سیاسی و اخلاقی مخ تفی کشمیری تا حق ءِ۔ بین الاقوامی کانود و حق خودارادیت نا بابت اقوام متحدہ نا ڈکلیریشن نا رداٹ کشمیری تے تینا حق خودارادیت کن جہد اٹی غٹ دوئی وڑوڈول ءِ اختیار کننگ ناحق دوئی ءِ۔ پاکستان عشرہ غاتیان ایسر نا چاری کشمیر نا ویل انا کشمیری الس نا است خواہی و سلامتی کونسل نا تعلقدار قرارداد آتا رداٹ منصفانہ ایسری نا بارواٹی پرعزم ءِ۔
اوپارے کہ کشمیر ناویل ءِ منصفانہ انداز اٹی ایسر کننگ آن بیدس سویلی ایشیاٹی امن ءِ اڈ تننگ مفک ، چنانچہ کشمیری تے اوفتا حق خودارادیت تننگ نا وعدہ ءِ پورو کننگ بے حد المی ءِ۔ پاکستانی مندوب پارے کہ اقوام متحدہ نا بنداو آتیٹی حق خودارادیت ءِ امنا کننگ نا باوجود مچ آ دنیا ٹی کیہی خلقت آتے داسہ ہم دا حق دوئی اف۔ ہر اسٹ غاصب واک علاقہ غاتیا غیر کانودی کوزہ کن اسہ ہی وڑنا جواز پیش کیرہ و کانودی حق خودارادیت ءِ توننگ کن دا حق اکن جہد ءِ دہشت گردی گوندنگ نا کوشست کیرہ ۔
اوپارے کہ خلقت آتا عزم ءِ واک انا زور آ توننگ مفک۔ واک انا زور آ حق ءِ نہ مست توننگانے و نہ ہی توننگ مریک۔ پاکستانی مندوب مقبوضہ کشمیر اٹی شاری تا حالیت آتے تشویشناک گوندا وپارے کہ کشمیری تا اسہ پین نسل اس بھارت نا غیر کانودی کوزہ آن آجوئی نا خواست کننگ ءِ۔ دا جہد نا سروکی ءِ کشمیری ورناک کننگ ءُ ہرافتا دوتیٹی آجوئی نا خواست و کانودی جہد آن بیدس ہچ اس اف۔ اوفتے دا جہد نا نتیجہ ٹی ہردے سم و کرفیو تون مون تروکی ءِ۔ داکان بیدس ڈاکٹر ملیحہ لودھی نیو یارک اٹی او آئی سی نا اسہ دیوان اسے ٹی کشمیر نا ویل ءِ او آئی سی دیوان نا ایجنڈہ ٹی اوار کننگ نا خواست کرے۔ اوکشمیری تا مخ تفی آ او آئی سی نا منت واری ءِ ہم ادا کرے۔
