کابل(پاکستان نیوز پوائنٹ 3 نومبر2016ء) اوغان فورسز آک قطبی صوبہ فاریاب اٹی آپریشن نا وخت 31عسکریت پسند نا تپاخت کننگ نا داوا کرینو۔ ننگرہار اٹی فضائی جلہو اٹی داعش نا شش جنگوڑو تپاخت کریر، پکتیکا ٹی مبنی برہدف کارروائی ٹی حقانی رڑ انا اسہ اہم ءُ کمانڈر اسے تپاخت کننگ نا داوا کننگانے۔ اوغان میڈیا نا رداٹ فاریاب نا گورنر سید انوارسادات پارے کہ خواجہ سبز پوش نا ضلع ٹی طالبان و ایلو عسکری رڑتا برخلاف کارروائی جاری ءِ و داوخت اسکان سیکورٹی فورسز آتون جھیڑہ غاتیٹی 31عسکریت پسند تپاخت کرینو ہرافتے ٹی زیادہ تر طالبان ءُ۔
صوبہ ننگر ہار اٹی فضائی جلہو اٹی داعش نا شش جنگوڑو تپاخت کریر۔ اوغان وزارت دفاع نا کنڈآن جاری مروک آ اسہ بیان اسے ٹی پاننگانے کہ ننگرہار نا ضلع پیشرا گام اٹی داعش نا اسہ ٹھکانہ اسے نشانہ جوڑ کننگا، دا کارروائی ٹی شدت پسند تنظیم نا 6جنگوڑو خلنگار۔ صوبہ سرائے پل اٹی طالبانک کیہی خلق آتیا کوزہ کریر۔ اوغان میڈیا نارداٹ داکان مست پولیس و سیکورٹی کارندہ غاک دا علاقہ غاتیان پیش تماسر۔
اوغان وزارت داخلہ نا کنڈآن کابل اٹی جاری مروک آ اسہ بیان اسے ٹی پاننگانے کہ دے ٹکی اوغانستان نا صوبہ پکتیکا ٹی اسہ مبنی برہدف کارروائی ٹی حقانی رڑ انا اسہ اہم ءُ کمانڈر اسے تپاخت کننگا۔ بیان اٹی پاننگانے کہ سیکورٹی فورسز آتا کارروائی ٹی کمانڈر ولید المعروف جمشید ءِ نشانہ جوڑ کننگا۔
