اقوام متحدہ(پاکستان پوائنٹ نیوز 16 مئی 2018ء) پاکستان پارینے کہ کیہی ملک و ڈیہہ تیٹی انتہاپسندانہ نظریہ غاتے مون آ دروک آ تہہ نا سیبو تتون اوار اوار درملکی نیام تمنگ و کوزہ کون آ پیشن نا خرابی تیا ہم چکار کننگ نا گرج ءِ۔ اقوام متحدہ ٹی پاکستان نا آخبتی مندوب ڈاکٹر ملیحہ لودھی 193 باسکی جنرل اسمبلی نا دیوان آن تران اٹی پارے کہ ننے دہشت گردی نا لعنت ءِ ماس آن کشکنگ و خسنگ کن 2006ء ٹی اختیار کروک آ حکمت عملی نا رداٹ بیدادانتہاپسندی ءِ مون آ دروک آتا سوج آہم چکار کروئی مریک۔
جہانی ادارہ نا انسداد دہشت گردی حکمت عملی نا جاچ ءِ ہلنگ نا چرجوئی ٹی اڈ ہلوک آ ششمی دیوان ءِ پاکستانی مندوب پارے کہ ہندا حکمت عملی نا چار بنداوی ٹک آتے ٹی دہشت گردی کن سازگار حالیت آتون مون تننگ، دہشت گردی ءِ توننگ و اوڑتون مون تننگ، دہشت گردی تون مون تننگ کن ریاست آتا کاریم نا کچ اٹی ودکی کننگ و انسانی حق انا شرف و کانود نا حکمرانی ءِ المی جوڑ کننگ کن گام گیج کننگ اوار ءُ۔
پاکستانی مندوب سلامتی کونسل نا دیوان آن مست دنیا نا 15ملک آتا مندوبین آتے کن سورہ نا ہم بست و بند کرے ہراٹی انسداد دہشت گردی نا بابت جہانی ادارہ نا حکمت عملی آ دا مندوبین آک تین پہ تین خیال آتا درشانی ءِ کریر۔ پاکستانی مندوب داوخت آ غزہ ٹی کودک فلسطینی تا برخلاف اسرائیل نا ریاستی دہشت گردی نا سخت مذمت ءِ کرے۔ او انڈونیشیا ، فرانس و اوغانستان اٹی ہم دہشت گردی نا کارروائی تا مذمت ءِ کرے۔
اوپارے کہ جنرل اسمبلی نا برجادیوان دہشت گردی نا چٹفنگ نا بابت مون آ بروک آ پوسکن آ چیلنج و خلیس آتا جاچ ءِ ہلسا دافتے تون مون تننگ نا سفارشات تیار کننگ نا موقع فراوان کیک۔ اوداہیت آ زور شاغا کہ دہشت گردی تون مون تننگ کن داحالیت آتیا خصوصی چکار کننگے ہرا دہشت گردی ءِ مون آ دننگ نا سوب جوڑ مریرہ۔ پرتشدد انتہاپسندی نا چٹفنگ نا داڑکن کاریم کروک آتا بیانیہ نا گچین ورندی ءِ تننگ ہم المی ءِ۔
پاکستانی مندوب پارے کہ دہشت گردی نا بچنگ نا حکمت عملی نا بابت دا غلط تاثر ودی کننگ انگ ءِ کہ پرتشدد انتہاء پسندی بیرہ گڈ گورننس، انسانی حق، شونداری و قومی کہول آ کانود نا حکمرانی مفننگ نا براہ راست نتیجہ ءِ۔ اوپارے کہ درملکی نیام تمنگ و کوزہ، بھلو وخت اسے آن جاری جھیڑہ غاک، جہانی کہول آ کانود نا حکمرانی ٹی کمتی و پردیسی تا کمیونٹی تا راجی و سیاسی محرومیک ہم پرتشدد انتہاپسندی نا مون آ دنگ اٹ کڑد ادا کننگ ءُ۔ و دہشت گردی نا چٹفنگ نا ہر جامع حکمت عملی ٹی ننے دا غٹ الم آتے مون آ تخوئی مریک۔
