واشنگٹن(پاکستان نیوز پوائنٹ 26اگست 2016ء) امریکہ پاکستان و اوغانستان تون پارینے کہ او دہشت گردی نا برخلاف جنگ اٹی اسہ ایلو تون کمک کیر ۔ امریکی محکمہ خارجہ نا ترجمان الزبتھ ٹروڈیو تدوک آ دے معمول نا پریس بریفنگ اٹی اوغان صدر نا کنڈآن کابل یونیورسٹی جلہو نا ڈٹ پاکستان اٹی جوڑ کننگ نا دوبہ غا ہروڑنا تبصرہ غان انکار کرسا پارے کہ الزام تراشی آن بیدس ہڑتوم آ ملک آتے دہشت گردی نا برخلاف اسہ ایلو نا کمک ءِ مون آ دروئی مرے۔
ترجمان پارے کہ ہراوڑنن مسکوہی ٹی کرینن، داسا ہم نن ہڑتوم آ ملک آتا است بڈی ءِ کننگ اُن کہ او اسہ ایلو تون کمک کیر تانکہ آخبت اٹی داوڑنا واقعہ غاتا سدباب مننگ کے۔ دہشت گرد رڑتا برخلاف پاکستان نا کنڈآن کروک آ سوج آ ترجمان پاک فوج انا سروک جنرل راحیل شریف نا ساڑی آ بیان نا حوالہ ءِ تس ہراٹی او صفاوڑاٹ پارینے کہ دہشت گرد رڑتا برخلاف بے پرخ کارروائی کننگک۔
اوکان بیدس امریکی وزیر خارجہ جان کیری امریکن یونیورسٹی کابل آ دہشت گردی نا جلہو نا ترندی اٹ مذمت ءِ کرے۔ تینا بیان اٹی جان کیری پارے کہ دا دہشت گردی نا اسہ لغورانہ کارروائی اسے و دہشت گرد آک داوڑنا گام گیج آتیان امن نا اڈتننگ نا کنڈا اوغانستان نا سفر ءِ توننگ کپسہ۔ اوپارے کہ امریکن یونیورسٹی کابل اوغان تے کن اومیت نا بنجا جوڑ سلک۔
