مدینہ منورہ (پاکستان نیوزپوائنٹ 23مئ2017ء) وزیراعظم محمد نواز شریف سعودی عرب نا مسہ دے ئی دورہءِ پورو کننگ آن پد سے شنبے نا دے مدینہ منورہ غان اسلام آباد کن رادہ مس۔ پرنس محمد بن عبدالعزیز انٹرنیشنل بالی پٹ آ مدینہ نا گورنر شہزادہ فیصل بن سلمان و پاکستانی سفارت خانہ نا بڑزکو کمامدارآک وزیراعظم ءِ رخصت کریر۔ گورنر مدینہتون ہیت وگپ کرسا وزیر اعظم پارے کہ پاکستان و سعودی عرب نا نیام اٹ تعلقداری آزموندہ ءُ و وخت انا تدینگ انگ تون اوار سوگو مسنو۔
اوپارے کہ نن سعودی عرب تون تینا تعلقداری تا بھاز قدر ءِ کینہ۔ وزیراعظم پارے کہ پاکستان دا تعلقداری تے پوسکن آ بڑزی تسکان دننگ نا خواہندار ءِ۔ وزیراعظم آفس نا کنڈآن جاری بیان نا رداٹ داوخت آ گورنر مدینہ پارے کہ نن پاکستان تون تعلقداری تا بھاز شرف ءِ کینہ۔ دا مذہبی پس منظر تخوک برادر ملک ءِ۔ اوپارے کہ دہشت گردی نا برخلاف جنگ اٹی پاکستان نا کڑد ستاکڑزک۔ یات سلے کہ وزیراعظم تینا مسہ دے ئی دورہ ٹی اولیکو عرب اسلامی امریکہ سروک کانفرنس اٹی شرکت کرے۔ او مدینہ منورہ ٹی روضہ رسول آ حاضری ہم تس۔ وزیراعظم ریاض الجنہ ٹی نفل اس ہم خوانا و شونداری و شونہالی کن دعاہم کرے۔
