کابل(پاکستان نیوز پوائنٹ 21مارچ2017ء) اوغانستان اٹی ڈرون جلہو و سیکورٹی فورس آتا کارروائی تیٹی طالبان نا نائب گورنر تون اوار 50 آن زیات عسکریت پسند تپاخت کریر۔ اوغان میڈیا نا رداٹ دے ٹکی صوبہ پکتیکا ٹی امریکی ڈرون جلہو آتیٹی چار کمانڈرآتون اوار 33عسکریت پسند تپاخت کریر۔ صوبائی گورنر نا دفتر آن جاری بیان اٹی پاننگانے کہ اسہ ڈرون جلہو اس تنگی ایریا ٹی کننگا ہراٹی 27 جنگوڑو خلنگار۔
اوفتے ٹی اِرا پنی کمانڈر ہم اوار ئسر۔ کمامدارآتارداٹ ڈرون جلہو ہمووخت آ کننگا ہراتم جنگوڑو آک تینا اسہ سنگت اسے نا نماز جنازہ ءِ اداکریرہ۔ صوبہ کپیسا ٹی اوغان فورس آتا بمباری ٹی طالبان نا نائب صوبائی گورنر تون اوار 9 عسکریت پسند تپاخت کریر۔ اوغان فوج انا رداٹ دا علاقہ ٹی طالبان تا برخلاف پبی کارروائیک برجاءُ۔ قطبی صوبہ جوزجان اٹی سیکورٹی فورس آک داعش نا 8 جنگوڑو آتے تپاخت کننگ نا داوا کرینے۔ کمامدارآک پاریر کہ کہوک آتیٹی اِرا کمانڈر ہم اوار ءُ۔ صوبہ لوگر اٹی اسہ جھیڑہ اسے ٹی مسہ طالبان نا تپاخت نا داوا کننگانے۔ ہنداوڑ لغمان اٹی اسہ فضائی جلہو اسے ٹی چندی جنگوڑو آتا تپاخت نا داوا کننگانے۔ دا جلہو لغمان نا علاقہ علینگر اٹی کننگا۔
